У Беларусь прыходзяць імгненныя плацяжы. Інавацыйны сэрвіс для юрыдычных асоб пачне працаваць 1 ліпеня, а ўжо з новага года такой паслугай змогуць скарыстацца ўсе грамадзяне Беларусі. Праходжанне плацяжу ад плацельшчыка да атрымальніка з адлюстраваннем у бухгалтарскім уліку зойме да хвіліны. Укараненне новых тэхналогій у банкаўскую сферу - адна з мер стратэгіі развіцця галіны да 2020 года. Сёння ў прыярытэце - абнаўленне прававой базы, гарантаванне інфармацыйнай бяспекі і спрашчэнне традыцыйных аперацый з дапамогай новых распрацовак ад прыватных кампаній.
Тэму працягне Антон Малюта. Насамрэч інавацыі - гэта не так ужо і складана. І вось просты прыклад. Бярэм кававы аўтамат, бярэм QR-код, сумяшчаем - і ў выніку атрымліваем каву па безнаяўным разліку. І без пошуку дробязі ў кішэнях. Запампоўваць дадаткі або аплачваць паркоўку з дапамогай QR-кода для шматлікіх беларусаў ужо даўно стала звычкай. Тэлефон стаў зручнай аплатнай прыладай, але выкарыстоўваць яго магчымасці пакуль атрымліваецца не ўсюды. І гэта спрыяльная глеба для стартапаў.
Галоўная навіна - аплаціць тавар або паслугу можна з дапамогай мабільнага дадатку любога банка. І гэта толькі адно рашэнне ад адной з фінтэхкампаній. Стварэнне такіх інавацыйных сэрвісаў прапісана ў стратэгіі банкам ад рэгулятара. Залучыць усіх кліентаў у лічбавыя каналы абслугоўвання - адна з галоўных задач. Свежай статыстыкай дзеліцца Беларусбанк: калі 3-4 гады таму праз касы праходзіла каля 75 % плацяжоў, то сёння меней за 20 %. Дарэчы, зараз кіраўніцтва банка рыхтуе прапановы для развіцця на пяць гадоў наперад.
Банкі сёння ўшчыльную займаюцца і пытаннямі кібербяспекі. Падрыхтаваны праект канцэпцыі, дзе самае галоўнае - абарона асабістай інфармацыі кліента. Распрацоўшчыкі абяцаюць, што прававая база будзе паспяваць за новымі выклікамі. Прадстаўнікі банкаў заяўляюць: трэба павышаць фінансавую граматнасць беларусаў, даказваючы, што плацяжы праз інтэрнэт-сэрвісы - гэта танна, хутка і зручна. Як гэта зрабіць - рэгулятар улічыць прапановы і бізнесу, і спажыўцоў. Абноўленую стратэгію развіцця лічбавага банкінгу плануюць прадставіць ужо сёлета.
