Дыялог аб больш цесным двухбаковым супрацоўніцтве Беларусі і Аўстрыі прадоўжыўся ў Палаце прадстаўнікоў. Уладзімір Андрэйчанка адзначыў, што Беларусь заўсёды выступала і выступае за раўнапраўныя адносіны з Еўропай і ЗША. У сваю чаргу першы намеснік старшыні Нацыянальнага савета Аўстрыі Карлхайнц Копф прапанаваў стварыць у парламентах дзвюх краін групы сяброўства, тым самым падтрымліваць пастаянны дыялог на ўзроўні заканадаўцаў.
Уладзімір Андрэйчанка, старшыня Палаты прадстаўнікоў Нацыянальнага сходу Беларусі: "У выпадку сустрэчнай прапановы з боку аўстрыйскіх парламентарыяў парламент Рэспублікі Беларусь гатовы стварыць такую групу сяброўства па супрацоўніцтве з парламентам Аўстрыйскай Рэспублікі. Я думаю, гэта дазволіла б ўстанавіць такія больш шчыльныя кантакты, абменьвацца вопытам у заканадаўчай дзейнасці".
На новы ўзровень павінна выходзіць і эканамічнае супрацоўніцтва па лініі Беларусь - Аўстрыя. Вялізны патэнцыял таксама ёсць у навуцы, адукацыі, медыцыне і турызме. Уладзімір Андрэйчанка выказаў надзею, што да канца года ў Беларусі будзе адчынена пасольства Аўстрыі. Гэта надасць пазітыўны імпульс супрацоўніцтву дзвюх краін.
