Віцебскі футравы камбінат плануе да канца гэтага года выйсці на поўную праектную магутнасць па вырабе шкур аўчыны, а ў наступным - па перапрацоўцы пушніны.
Сёння з кіраўніцтвам камбіната і працоўным калектывам сустрэўся Старшыня Белтэлерадыёкампаніі Іван Эйсмант. Падчас сустрэчы было адзначана: на камбінаце самае сучаснае абсталяванне, але пакуль працаваць у поўную сілу не дазваляе некалькі прычын. У тым ліку і адсутнасць узгодненай цаны на сыравіну.
Іван Эйсмант, Старшыня Белтэлерадыёкампаніі: "Выдатная пушніна вырабляецца, але вельмі цяжка канкурыраваць з прадукцыяй азіяцкай. Як запэўніваюць тут, на 15-20 % можна было б патанніць прадукцыю, знізіць выдаткі. Для гэтага трэба, каб былі прынятыя вызначаныя рашэнні. Напрыклад, прапаноўваецца стварыць сумеснае прадпрыемства. Стварэнне вялікага холдынга, які будзе ўключаць і зверагаспадаркі, і вось такія вось прадпрыемствы. Прадукцыя будзе таннейшая".
З выхадам на поўную магутнасць на прадпрыемстве павялічыцца колькасць рабочых месцаў - са 180 да 560. Камбінату патрэбны профільныя спецыялісты. У цэлым жа праектная магутнасць мадэрнізаванага камбіната дазваляе перапрацоўваць 250 тысяч шкур пушніны і 300 тысяч аўчыны.
