Толькі лясгасы Брэсцкай вобласці плануюць нарыхтаваць парадку 5 тысяч тон натуральнага прадукту. Сёлета попыт на напой высокі. У мінулым з-за кароткага сезона нарыхтоўкі не ўсе змаглі здаволіць смагу гэтым запатрабаваным напоем.
Як выбіраюць плантацыі для нарыхтоўкі бярозавіка, ведае наш рэгіянальны карэспандэнт Вікторыя Патоня. Гэтай вясной сезон нарыхтоўкі бярозавіка стартаваў рана, яшчэ ў першых чыслах сакавіка. Зараз назіраецца масавы збор. Хаціслаўскае ляснікоўства адно з першых пачало падсочку бяроз, толькі на гэтай плантацыі паўтары тысячы дрэў. Збіраюць натурпрадукт па тэхналогіі: адбіраюць дзялянку, дзе бярозы растуць парадку 60 гадоў.
Дасведчаныя лесаводы ведаюць: калі строга выконваць правілы падсочкі, нашкодзіць дрэву нельга. Адтуліна для жалабка не павінна быць глыбейшай за 2 сантыметры. У канцы сезона рану дрэва замазваюць глінай. Так яно застаецца жывым. Дарэчы, з адной бярозы здабываюць не ўвесь сок, а ўсяго некалькі літраў прыроднага эліксіра. Карысны напой прыносіць лясгасам прыбытак. У пакеты разам з вітамінамі капаюць грошы. У ляснікоўстве можна здабыць сок самастойна. Гэта бясплатна, трэба толькі атрымаць дазвол, і вам вылучаць месца для збору. За незаконную здабычу прадугледжаны штраф да пяці сотняў рублёў. Але большасць людзей аддаюць перавагу купляць сок у нарыхтоўшчыкаў. Літр эканапою каштуе ўсяго 15 капеек. Пётр Захарчук кожны год прыязджае ў бярозавы гай. Гаворыць, для сям'і гэта ўжо традыцыя.
Бярозавік - прадукт, які хутка псуецца. Таму з лесу ён адразу ідзе на перапрацоўку. На працягу 12 гадзін яго трэба альбо замарозіць, альбо прастэрылізаваць. На гэтым камбінаце ў Маларыце плануюць перапрацаваць 350 тон сапраўды народнага напою. Кожная партыя праходзіць лабараторны кантроль і тэрмічную апрацоўку. Захоўваецца сыравіна ў антысептычных цыстэрнах, што дазваляе пастаўляць на рынак свежую прадукцыю ўвесь год. На прадпрыемстве распрацаваныя ўласныя рэцэптуры, якія ўсмакаваліся і замежным спажыўцам.
Эліксір маладосці, вітамінавы прадукт. Так яшчэ завуць гэты вясновы напой урачы-дыетолагі. Ён дапамагае ўмацоўваць імунітэт. Супрацьпаказаны толькі людзям з алергіяй на бярозавы пыл. Напой сапраўды папулярны і паспяхова экспартуецца ў краіны СНД, Італію, Германію, Малдову і нават Кітай.
Галіна Дуль, загадчык аддзялення Брэсцкага абласнога цэнтра гігіены, эпідэміялогіі і грамадскага здароўя: "Бярозавік карысны для дарослых і дзяцей, улічваючы, што ўтрымлівае вялікую колькасць мікраэлементаў. Напрыклад, магній, калій, кальцый, жалеза. Вельмі добра дапамагае людзям падчас паніжэння артэрыяльнага ціску, аказвае агульнаўмацавальнае дзеянне".
Толькі ў Брэсцкай вобласці сёлета плануюць нарыхтаваць каля 5 тысяч тон прыроднага напою. А ўжо прыбытак істотна будзе залежаць ад надвор'я! Менавіта яно дыктуе, наколькі працяглым будзе сезон нарыхтоўкі.
