Сёння візіт індыйскага лідара ў Беларусь працягваецца. У Нацыянальнай бібліятэцы ўжо ўсё гатова да прыезду кіраўнікоў дзяржаў Аляксандра Лукашэнкі і Пранаба Мукерджы. Тут адбудзецца вялікі эканамічны форум. Сярод удзельнікаў каля сотні кампаній.
На месцы ўжо працуе наш карэспандэнт Сяргей Гусачэнка (прамое ўключэнне). Прадстаўнікі дзелавых колаў зараз на шляху ў Нацыянальную бібліятэку. Хоць варта адзначыць, што менеджмент асобных кампаній ужо тут. Рэгістрацыя ўдзельнікаў форуму пачнецца праз паўгадзіны. Старт жа, паводле праграмы, прызначаны на 11:30. Арганізатары гавораць аб вельмі вялікім саставе - усяго больш за 100 кампаній - беларускіх і індыйскіх прыкладна пароўну.
Прэзідэнты дзвюх краін таксама будуць удзельнічаць у рабоце форуму. У пленарнай частцы запланаваны кароткія выступленні двух лідараў.
Таксама кіраўнікі дзяржаў будуць назіраць за дыстанцыйнай урачыстай цырымоніяй. У Гродне на ЦЭЦ-2 адбудзецца адкрыццё памятнага знака аб рэалізацыі беларуска-індыйскага праекта. Размова аб мадэрнізацыі энергетычнага аб'екта - яе правялі пры ўдзеле індыйскай кампаніі. Інвестыцыі ацэньваюць у 55 млн долараў. Адкрыццё знака будзе трансліравацца на маніторах у рэжыме анлайн.
Учора быў падпісаны шэраг рамачных дакументаў - сёння надышоў час кропкавых пагадненняў. Падчас бізнес-форуму плануецца падпісанне шэрагу кантрактаў паміж прадпрыемствамі і арганізацыямі Беларусі і Індыі. Іх колькасць і сумы мы даведаемся крыху пазней.
Што да гандлёвых адносін дзвюх краін, то тут лічбы пакуль далёкія ад чаканых. 400 млн долараў. Палепшыць паказчык - прамая мэта бізнес-форуму. Сёння на індыйскім рынку прыкладна 70 найменняў беларускай прадукцыі. Але аснова экспартнага кошыка - гэта калій і грузавая тэхніка. Мы ж завозім у асноўным лекі, рыбу, вядома, каву і гарбату. У цэлым сальда гандлю з Індыяй у нас станоўчае. Але агульная лічба гандлю, яшчэ раз паўтаруся, пакуль не вялікая.
Што да самога форуму, складацца ён будзе з дзвюх частак. Тая самая пленарная, аб якой я ўжо гаварыў, і кантактна-кааперацыйная біржа. У тым ліку і сустрэчы ў фармаце В2В. Словам, ёсць усе ўмовы, каб прадстаўнікі дзелавых колаў знайшлі агульную мову і папрацавалі прадуктыўна. Яшчэ раз нагадаю, у Нацыянальнай бібліятэцы чакаюць прыбыцця прэзідэнтаў. Апоўдні мы паведамім вам першыя вынікі працы форуму.
