У Мёрах рэалізуецца маштабны праект па імпартазамяшчэнні

5 Сакавіка 2020
Ідзе будаўніцтва завода па вытворчасці белай бляхі - гэта сучасны пакавальны матэрыял, які выкарыстоўваецца ў харчовай прамысловасці. Аб'ект узводзяць па дзяржпраграме інавацыйнага развіцця і ўказе Кіраўніка дзяржавы. А гэта больш за 300 мільёнаў еўра інвестыцый, 600 рабочых месцаў і тэхналогіі, якія ў нашай краіне ўжываюць упершыню. Але запуск вытворчасці пераносіцца. А значыць, падстава ўмяшацца Камітэту дзяржкантролю. Сустрэча з кіраўніцтвам прадпрыемства і рэгіёна выявіла некалькі праблемных момантаў. Вольга Маслоўская даведалася дэталі. 

600 рабочых месцаў, поўная замена імпарту, 80 працэнтаў продажу за мяжу. Але ўсё гэта пакуль толькі ў перспектыве. Гатовасць завода белай бляхі ў Мёрах - больш за 90 працэнтаў.

Запуск вытворчасці пераносіцца на май

У цэхах цішыня, даносяцца толькі гукі будаўнічых работ. А паміж тым, паводле бізнес-плана, у канцы мінулага года завод павінен быў пачаць выпуск белай бляхі. Сучасны пакавальны матэрыял чакаюць спажыўцы як у краіне, так і за мяжой. У Мёрах плануюць выпускаць 240 000 тон тонкай ліставой сталі. 

У Мёрах будуць выпускаць 240 000 тон белай бляхі

Штогод Беларусь імпартуе 35 000 тон белай бляхі. Гэта ў яе разліваюць згушчанае малако і кладуць шпроты. Завод у Мёрах цалкам закрые патрэбнасць краіны, але галоўная мэта - прасоўванне на сусветным рынку. І тут у беларусаў ёсць казыры.
Выпрабаваць у справе высокадакладнае абсталяванне ў тэрмін не дазволілі некалькі прычын. Зацягнуліся тэрміны будаўніцтва на пачатковым этапе - палі танулі ў балоце. А на завяршальнай стадыі паўсталі праблемы з крэдытаваннем. Лінію дадатковага фінансавання адкрылі ўсяго некалькі дзён таму, час сышоў. 

Спецыялістаў рыхтуюць у Расіі, Германіі, Бельгіі

Унікальная для Беларусі вытворчасць павінна зарабіць у маі. Задача дзяржорганаў - дапамагчы інвестару і калектыву. Бо ў гэтага імпартазамяшчальнага праекта ёсць каласальны эфект: у малы горад пачалі вяртацца спецыялісты. На працу сюды едуць нават з-за мяжы. Дамір Асанаў працаваў вальцоўшчыкам на металургічным камбінаце ў Тэміртау. Зараз асвойвае новыя машыны ў цэху Мёрскага металапракатнага. 

Інвестпраект даў штуршок развіццю сацыяльнай сферы раёна

Моцны штуршок і для сацыяльнай сферы: у Мёрах адкрылася новая бальніца, праектуецца паліклініка і міжраённы кардыяцэнтр, для спецыялістаў прадпрыемства пабудаваны сучасны жылы квартал. Як толькі завод выйдзе на праектную магутнасць, паступленні ў мясцовы бюджэт за кошт падаткаў вырастуць на 50 працэнтаў. А гэта гарантыя стабільнага развіцця.