У Мінску зараз размешчаны Суд ЕАЭС - пагадненне аб умовах знаходжання ў Беларусі Суда Еўразійскага эканамічнага саюза заключылі сёння ў сталіцы. Ад нашай краіны дакумент падпісаў першы намеснік міністра замежных спраў Аляксандр Міхневіч, ад Суда ЕАЭС - яго старшыня Аляксандр Федарцоў. Заключэнне пагаднення стала "важнай падзеяй у развіцці і ўдасканаленні працэсаў еўразійскай інтэграцыі", - адзначылі на цырымоніі падпісання ў беларускім МЗС.
Аляксандр Міхневіч, першы намеснік міністра замежных спраў Беларусі: "Гэта найважнейшы інстытут ЕАЭС, які будзе адсочваць выконванне як дзяржавамі, так і органамі ЕАЭС норм права, якое мы сфарміравалі. У суд могуць звяртацца як дзяржавы ЕАЭС, так і прадпрымальніцкія структуры. У адпаведнасці з падпісаным пагадненнем Суду ЕАЭС бязвыплатна перадаецца будынак на вуліцы Кірава ў цэнтры Мінска".
Аляксандр Федарцоў, старшыня Суда Еўразійскага эканамічнага саюза: "У гэтым дакуменце прадугледжаныя не толькі ўмовы для дзейнасці суда, але і правы, і імунітэты ўдзельнікаў судовых працэсаў. Суд ЕАЭС запатрабаваны як орган міжнароднага правасуддзя. На дадзены момант у суд паступіла 11 заяў, з іх 6 разгледжана. Сёння ў судзе на разглядзе знаходзіцца заява аб растлумачэнні, дзве апеляцыйныя скаргі. Сёлета ўжо вынесеныя два судовыя рашэнні па заявах суб'ектаў гаспадарання. Аператыўнай і актыўнай дзейнасці суда спрыяюць, у тым ліку, тыя ўмовы, якія стварае Беларусь".
Суд ЕАЭС - пастаянна дзеючы судовы орган саюза. Ён створаны ў мэтах забеспячэння аднастайнага ўжывання дзяржавамі - членамі і органамі ЕАЭС міжнародных дамоў і іншых абавязковых прававых дакументаў.
