Стварэнне адзінага сыравіннага рынку Еўразійскага эканамічнага саюза абмяркоўваюць у Мінску ўдзельнікі І Еўразійскага горна-геалагічнага форуму. Ён адкрыўся ў беларускай сталіцы сёння. Гэта пляцоўка для абмену меркаваннямі, тэхналогіямі і спецыялістамі. Ва ўмовах няпростай эканамічнай сітуацыі ў свеце нібы сам час дыктуе неабходнасць больш цеснага кантакту профільных спецыялістаў з тым, каб знаходзіць унутраныя рэсурсы і аптымальна выкарыстаць наяўныя прыродныя і людскія багацці партнёраў па інтэграцыйным аб'яднанні. Дарэчы, пытанні мінеральна-сыравіннай базы не аднойчы паднімаліся і на ўзроўні Кіраўніка дзяржавы. Прэзідэнт не раз засяроджваў увагу на нарошчванні экспарту паслуг і скарачэнні імпарту сыравіны, якой у Беларусі лішак. Так што падпісаныя дамоўленасці ў рамках ЕАЭС адкрываюць новыя магчымасці для забеспячэння мінеральным сырцом нацыянальных эканомік кожнай з краін-удзельнікаў.
Пра перспектыўныя праекты, інвестыцыі і сумеснае засваенне радовішчаў - наш карэспандэнт Святлана Лук'янюк.
Мінск у гэтыя дні прымае спецыялістаў горназдабыўной галіны Беларусі, Расіі, Казахстана, Кіргізіі, Арменіі і Таджыкістана. На фоне падзення цэн на сыравіну і неабходнасці скарачаць імпарт таго, на што багатыя і самі, сёння гавораць пра стварэнне адзінага сыравіннага рынку Еўразіі. Але на шляху да яго неабходная ў першую чаргу агульная заканадаўчая база.
Менавіта пра павелічэнне аб'ёму капіталаўкладанняў у геолагаразведку кожнай краіны ідзе размова на форуме. У Беларусі ўжо рэалізуюцца такія праекты з удзелам і расійскіх кампаній.
Тэхналагічныя распрацоўкі, якія абмяркоўваюцца сёння на форуме, дазволяць выкарыстаць мясцовую сыравіну і для імпартазамяшчэння. Напрыклад, у Беларусі вялікі вопыт у распрацоўцы радовішчаў нафты, калійных соляў і будматэрыялаў. За апошнія паўстагоддзя ў нас здабыта 130 мільёнаў тон чорнага золата. Гэта з пачатку правядзення першых работ на беларускіх радовішчах. Разам - 82 разведаныя і амаль столькі ж знаходзяцца ў распрацоўцы.
Пытанні мінеральна-сыравіннай базы не аднойчы паднімаліся і на ўзроўні Кіраўніка дзяржавы. На нарадзе ў канцы мінулага года Прэзідэнт акцэнтаваў увагу на нарошчванні экспарту паслуг і скарачэнні імпарту сыравіны, якой у Беларусі лішак. Бо ад гэтага залежыць і ўстойлівасць эканомікі. Таму сёння актуальнае пытанне ўкаранення высокаэфектыўных тэхналогій у здабычу і перапрацоўку выкапняў.
У Беларусі - каля 10 000 радовішчаў карысных выкапняў. Калі ўлічыць тэрыторыю ўсёй краіны, атрымліваецца, што на кожным дваццатым квадратным кіламетры - разведаныя нетры. Па пакладах торфу Беларусь на другім месцы ў СНД і 10-я ў свеце. А прамысловыя запасы калійных соляў амаль восем мільярдаў тон. Па гэтым паказчыку Беларусь у тройцы сусветных лідараў.
У гэтыя дні на форуме ў Мінску нашы спецыялісты дзеляцца сваімі методыкамі з калегамі з Еўразійскага эканамічнага саюза.
Гэты форум не проста спроба пазначыць агульныя праблемы, але і знайсці сумесныя шляхі іх рашэння. Кожнай з краін ёсць што прапанаваць. Адна багатая карыснымі выкапнямі, у іншай ёсць высакакласныя спецыялісты, у трэціх - сучасная тэхніка, якая можа выкарыстоўвацца на радовішчах.
Да прыкладу, мы не супраць запазычыць тэхналогіі здабычы руды ў Расіі і Казахстана. І гэты форум як раз дапаможа абмяняцца інфармацыяй, адаптаваць сённяшнія тэхналогіі да нашых радовішчаў.
Некаторыя з іх закладзеныя ў праграме Саюзнай дзяржавы "Геолагаразведка", яна зараз узгадняецца па фінансаванні. Таксама ўдзельнікі I Еўразійскага форуму разлічваюць па выніках працы ў Мінску падпісаць і двухбаковыя пагадненні паміж навуковымі цэнтрамі Беларусі, Расіі і Казахстана.
