У Лондане адбыўся Беларускі інвестфорум

14 Лістапада 2014

У Лондане адбыўся 4-ы Беларускі інвестфорум. Мерапрыемства прадоўжыла шэраг бізнес-сустрэч на прасторы ад Нью-Ёрка да Цюрыха, якія на працягу апошніх паўтара месяца наглядна прадэманстравалі: у асобе Беларусі замежныя партнёры бачаць надзейнага і прадказальнага партнёра. У сваю чаргу планы па мадэрнізацыі эканомікі нашай краіны не могуць быць рэалізаваныя без прыцягнення капіталу на знешнім фінансавым рынку. А Злучанае Каралеўства ўжо не першы год не толькі прыглядваецца, але і ўкладвае сродкі ў эканоміку Беларусі. У тым ліку і новыя кірункі прэзентавалі сёння ўдзельнікам форуму. Якія праекты абмяркоўвалі бізнес-эліты Мінска і Лондана?


З брытанскай сталіцы рэпартаж нашага карэспандэнта Сяргея Гусачэнкі. Шэсць аэрапортаў Лондана прымаюць больш за 30 млн чалавек за год. Але і гэтага брытанскай сталіцы ўжо мала. У планах пабудаваць сёмы, магчыма, на берагах Тэмзы. У найбуйнейшым горадзе Еўрасаюза не бывае пуста на вуліцах, а ў офісах транснацыянальных кампаній святло гарыць нават ноччу. Дынаміку фінансавага гіганта які раз адчулі на сабе беларусы. У 2008-м тут ужо прэзентавалі інвестыцыйныя магчымасці нашай краіны. Пасля гэтага форум пабываў у Маскве і Германіі, праз шэсць гадоў зноў вярнуўся на брытанскія астравы.


Апісанне Беларусі кампанія Даніэля падрыхтавала па заказе партнёраў з Лондана. Гід надрукавалі як раз напярэдадні форуму. У дыяграмах і графіках - аналіз эканомікі, інтэграцыя ў ЕАЭС і ключавыя галіны, куды Брытанія можа ўкладваць сродкі.


Беларуская дэлегацыя прыляцела ў Лондан загадзя. Некалькі дзён да афіцыйнага адкрыцця прысвяцілі перамовам і сустрэчам, у тым ліку на Лонданскай фондавай біржы, зрэшты, у закрытым для журналістаў фармаце. Бізнес-эліты дзвюх краін сабралі на знакамітай Пэл-Мэл. У шматлікіх будынкаў на гэтай вуліцы няма шыльдаў, але ўсе і без таго ведаюць: тут знаходзяцца знакамітыя джэнтльменскія клубы, дзе збіраецца ўвесь брытанскі істэблішмент.


Беларускі форум прайшоў у антуражы ампіру: будынак у 19-м стагоддзі пабудаваў галоўны каралеўскі архітэктар Джон Нэш. І нават кава-паўза тут у зале Ватэрлоа. Колькасць удзельнікаў першапачатковую лічбу перавысіла ўдвая, многія прозвішчы ў бейджы давялося ўпісваць дадаткова. Працу на форуме падзялілі на некалькі блокаў: макраэканамічны і інвестыцыйны. Кіраўнік дэлегацыі Сяргей Румас ва ўступным слове каротка пра галоўную мэту - адкрыць Брытаніі новую Беларусь, і перавагах для інвестараў: еўрапейскія законы, ліберальнае падаткаабкладанне, выхад на рынкі ЕЭП.


Брытанскі бізнес не першы год цікавіцца Беларуссю. Сёлета аб'ём інвестыцый склаў 2 млрд, а ўзаемны тавараабарот устанавіў рэкорд - набліжаецца да 3. У Беларусі зарэгістравана больш за 200 прадпрыемстваў з удзелам брытанскага капіталу. Іх колькасць зусім хутка папоўніць і Цім Макінтош: у сталічным рэгіёне ён гатовы пабудаваць завод па вытворчасці водаачышчальнага абсталявання. Працаваць плануе па ўсёй Еўразіі.


Тим Макінтош, кіраўнік кампаніі-інвестара: Мы вельмі хочам супрацоўнічаць з Беларуссю і ўжо нямала для гэтага зрабілі. На працягу двух тыдняў чакаем падпісанне дагавора аб стварэнні кампаніі на тэрыторыі Мінскай вобласці. Мы плануем працаваць не толькі на беларускі рынак, але і на краіны СНД.


Прадстаўнікі міжнародных фінансавых інстытутаў, транснацыянальных кампаній, інвестыцыйных банкаў. Усе яны сёння маглі пачуць не толькі выступленні, але і ўбачыць найбуйнейшыя нацыянальныя інвестыцыйныя праекты, куды дзяржава запрашае замежны бізнес і абяцае ўзаемавыгаднае партнёрства.


Аўтарытэтная аўдыторыя сёння даведалася яшчэ адну прыемную навіну. Дасягнута дамоўленасць аб стварэнні Савета дзелавога супрацоўніцтва Беларусі і Брытаніі. Першае пасяджэнне пройдзе ўжо ў наступным годзе. А сёлета Беларусь наведае дэлегацыя дзелавых колаў Злучанага Каралеўства.