У Пакістане актыўна рыхтуюцца да афіцыйнага візіту беларускага лідара. У Ісламабадзе працягвае працаваць бізнес-форум, у якім бяруць удзел кіраўнікі ключавых прадпрыемстваў дзвюх краін. Другі дзень перамоў пацвердзіў накіраванасць абодвух бакоў на максімальна прадукцыйнае партнёрства. Важным крокам у эканамічным напрамку стала пагадненне аб супрацоўніцтве паміж дзвюма гандлёва-прамысловымі палатамі і дакумент аб стварэнні дзелавога савета. У Ісламабадзе працуе наш карэспандэнт Сяргей Гусачэнка. У яго ўсе падрабязнасці другога дня.
Першы дзень пакістана-беларускага бізнес-форуму даказаў: заявы аб перспектыўным партнёрстве дзвюх краін зусім не пустыя словы. Актыўныя перамовы завяршыліся падпісаннем 12-ці пагадненняў на суму 42 млн долараў. Пры тым, што тавараабарот сёння ў раёне 60-ці. Але калі ўчора дыялог адбыўся на нейтральнай тэрыторыі - у бізнес-цэнтры аднаго з буйных гатэляў, сёння прадстаўнікі дзелавых колаў сабраліся ў Федэрацыі гандлёва- прамысловых палат Пакістана.
Для адной з найбуйнейшых краін у свеце па насельніцтве офіс гандлёвай палаты выглядае больш чым кампактна. Некалькі паверхаў і невялікія залы для перамоў. Затое пляцоўка для кааперацыі куды больш шырокая. Ёмісты і растучы рынак амаль у 200 млн чалавек. Рынак, якому патрэбная тэхніка, тэхналогіі і вытворчасці.
Ашфан Ахмад маркетолаг. У сям'і трое дзяцей, жонка без працы. Гаворыць, што перамены ў Пакістане відавочныя, але краіне не хапае прамысловага патэнцыялу і добрых рабочых месцаў. А яшчэ як ніхто іншы ён цэніць мір і стабільнасць. Гаворыць, стаміліся ад канфліктаў і спрэчак.
Ашфан Ахмад, маркетолаг: "Эканоміка Пакістана развіваецца, гэта відавочна. Але калі параўноўваць з іншымі краінамі, напэўна, стан цяжка назваць вельмі добрым. Але ўрад прыкладае сур'ёзныя намаганні, гэта відавочна. Я спадзяюся, што праца прынясе вынік. І ўзровень жыцця будзе паступова павышацца".
Не выключана, што жонка Ашфана ў хуткім часе зможа працаваць на прадпрыемстве, якое выпускае беларускія тавары. Аб намеры адразу некалькіх брэндаў прыйсці на рынак паведаміў міністр прамысловасці. Збіраць гатовыя не толькі трактары, але і іншую тэхніку, а таксама такое неабходнае аграрыям абсталяванне для сельгасмашын. Амаль траціна тэрыторыі краіны - гэта ралля. Ад ураджаю залежаць і харчовая бяспека, і экспартныя даходы.
Як раз наконт сумесных прадпрыемстваў сёння і гаварылі на бізнес-форуме. Пакістан запрашае Беларусь стварыць адразу некалькі вытворчасцяў у сферы машынабудавання і пабудаваць завод па выпуску ўгнаенняў. Сярод пераваг - танная рабочая сіла і мяккі падатковы рэжым.
Міян Мухамад Адрыс, прэзідэнт Федэрацыі гандлёва- прамысловых палат Пакістана: "Мы вельмі рады візіту дэлегацыі Беларусі ў Пакістан. У Пакістана вялікія магчымасці. Наша краіна - вароты ў Цэнтральную Азію. І нам вельмі цікавы патэнцыял Беларусі, магчымасці вашай прамысловасці і тое, якія тавары вы можаце нам прапанаваць".
На шырокіх дарогах Ісламабада хуткасны рэжым выконваюць рэдка. Гэтак жа дынамічна, дзесьці нават апярэджваючы чаканні, развіваюцца і кантакты Пакістана і Беларусі. Агульная сума заключаных кантрактаў ужо пераваліла за 50 мільёнаў долараў. Але перамовы працягваюцца без прысутнасці прэсы, і верагодна паказчык зменіцца. Сёння пра буйное пагадненне на 12,5 млн долараў паведаміла адна з буйных абутковых фабрык краіны - Белвест.
Між тым замежныя інвестары ўсё больш актыўна стукаюцца ў пакістанскія дзверы. І на рынку пакуль не так горача, як на вуліцы, але канкурэнцыя расце. Толькі Кітай гатовы ўкласці ў Пакістан 46 млрд долараў. Гэта самыя вялікія інвестыцыі ў гісторыі рэспублікі, зусім нядаўна з візітам тут пабываў і Старшыня КНР. Пра патэнцыял пакістана-беларускага партнёрства і новыя кірункі на вышэйшым узроўні будуць гаварыць напрыканцы тыдня - у Ісламабадзе з першым візітам чакаюць беларускага лідара. А сёння агучылі жаданую лічбу ўзаемнага гандлю. Яна павінна дасягнуць 1 млрд долараў. Амбіцыйныя планы зала сустрэла апладысментамі.
Для эканамічнага рыўку сёння зрабілі важны крок. Падпісана пагадненне аб супрацоўніцтве паміж дзвюма палатамі і больш шырокі дакумент аб стварэнні дзелавога савета. Першае пасяджэнне дамовіліся правесці ўжо восенню ў Мінску, таксама ў планах - правядзенне адразу некалькіх спецыялізаваных выстаў на беларускай і пакістанскай зямлі.
Май і чэрвень - самыя гарачыя месяцы ў Ісламабадзе. Але клімат ніяк не ўплывае на палітычную і дзелавую актыўнасць. Бізнес-форум працягваецца, і ёсць усе падставы меркаваць, што прыемная тэндэнцыя - ні дня без новых пагадненняў і кантрактаў - будзе прадоўжаная.
