Аб узаемадзеянні з яшчэ адным нашым гандлёва-эканамічным партнёрам - Украінай - ішла размова сёння ў Гомелі.
Там прайшло пасяджэнне Міжурадавай камісіі. Асаблівая ўвага - новым праектам у сферы транспартных зносін. Перспектывы - у развіцці водных шляхоў па трансмежных рэках. Гаварылі і пра магчымасці ўзмацніць прысутнасць беларускіх прадпрыемстваў ва Украіне. Дарэчы, сёлета тавараабарот дзвюх краін дасягнуў адзнакі 4 з паловай мільярды долараў. Планка ў наступным - павялічыць лічбу амаль у два разы за кошт развіцця машынабудавання, энергетычнага і аграпрамысловага комплексаў.
Генадзь Зубко, віцэ-прэм'ер-міністр - міністр рэгіянальнага развіцця, будаўніцтва і ЖКГ Украіны: "Мы ўбачылі вузкія месцы, якія сёння нам не дазваляюць хутка дасягнуць гэтых эфектаў. Гэта, у першую чаргу, транспартныя зносіны, гэта магчымасць памяншэння тарыфаў па пастаўцы і самае галоўнае - цэнаўтварэнне на нашы прадукцыі. Таму на гэтым і была засяроджана камісія ў першую чаргу".
Ігар Ляшэнка, намеснік прэм'ер-міністра Беларусі: "Мы ўнеслі невялікія карэкціроўкі ў частцы ўзмацнення гуманітарнага супрацоўніцтва, у пытаннях медыцыны, навукі. Вызначылі выразныя параметры, якія нам патрэбны для дасягнення пастаўленага кіраўнікамі дзяржаў: па тавараабароту. Самае галоўнае, што мы чуем, абодва бакі, адзін аднаго і бачым, што нам атрымаецца вырашыць гэтыя пытанні".
Сённяшнія дамоўленасці замацавалі дакументальна. Сустрэча дэлегацый завяршылася падпісаннем пратакола пасяджэння. Сімвалічна, што 26-я Міжурадавая камісія прайшла напярэдадні I Форуму рэгіёнаў Украіны і Беларусі, які адбудзецца ў канцы кастрычніка ў Гомелі і збярэ дэлегацыі 13-ці абласцей і паўсотні прадпрыемстваў.
