У Брэсцкай вобласці пачалі сеяць кукурузу

Пасяўная не збаўляе тэмпаў. У Брэсцкай вобласці пачалі сеяць кукурузу. На гэтым тыдні значна пацяплела: у рэгіёне слупок тэрмометра падняўся да 20 градусаў. Для насення кукурузы ўмовы проста выдатныя. Але ў цёплай вясны ёсць і недахопы. У рэгіёне даўно не было дажджоў, і на палях вельмі суха. Як аграрыі працуюць ў такіх умовах надвор'я - даведалася Марыя Тройніч.

Тэхніка прадпрыемства "Белавежскі" сёння працуе ў аблоках пылу: на палях суха, амаль, як у пустыні. Надвор'е для сяўбы кукурузы выдатнае: 20 градусаў цяпла. Але дажджоў не было некалькі тыдняў. А вільгаць вельмі патрэбная для добрага росту насення. Таму з глебы зараз імкнуцца выціснуць максімум.

Для Уладзіміра Кажушкі гэта ўжо 13-я пасяўная кампанія. І хоць лічба лічыцца нешчаслівай, у прыкметы механізатар не верыць. Кажа, атрымаць выдатны вынік можна нават пры складаных умовах надвор'я - было б жаданне. Акрамя асноўнай - на полі паспявае праводзіць яшчэ і вучэбную працу. У звязцы з механізатарам працуе студэнт-практыкант.

Сельгаспрадпрыемства “Белавежскі” - адно з найбуйнейшых у рэгіёне. Акрамя кукурузы тут зараз сеюць і буракі.

Усяго ў гаспадарцы 18 тысяч 800 гектараў ворных зямель. Плошча - немаленькая. Але, нягледзячы на аб'ёмы, скончыць працу плануюць у тэрмін. Тэхнікі хапае.

Гэтай вясной на палях хочуць пасеяць 260 гектараў буракоў. Па словах кіраўніцтва, калі надвор'е будзе дазваляць,  справяцца за тыдзень.

Каб атрымаць ураджай вышэйшай якасці, на прадпрыемстве “Аснежыцкае” ў Пінскім раёне пайшлі на эксперымент. Падчас сяўбы цукровых буракоў тут вырашылі паспрабаваць новую тэхналогію: купілі гібрыднае насенне, якое выведзена разам з прыдатным толькі ім гербіцыдам. Гэта дазволіць паменшыць колькасць хімічных апрацовак.

Нягледзячы на сакавіцкія маразы, якія тармазілі працы на палях, Брэсцкая вобласць сёння ў лідарах па тэмпах пасяўной

Зараз аграрыі чакаюць дажджоў. Хоць яны могуць запаволіць тэмпы палявых работ, кажуць, галоўнае не хуткасць, а якасць будучага ўраджаю.