За два апошнія месяцы рост цэн ледзь перавысіў 4%. Улічваючы паслабленне рубля ў пачатку года, павышэнне цэн на тавары адбылося нязначнае. Рэзкага скачка атрымалася пазбегнуць, дзякуючы эфектыўнай працы, як структур дзяржаўнага ўпраўлення, так і буйных рознічных сетак. Напрыклад, у найбуйнейшай гандлёвай сетцы "Еўраопт" цэны выраслі толькі на 3,5%, што на 0,6% менш, чым у цэлым па краіне. Каб дабіцца прымальных цэн для пакупнікоў, гандлёвая сетка пайшла на паніжэнне да нуля ўласнай рэнтабельнасці.
Падрабязнасці - у Веранікі Рымашэўскай.
Белстат ужо правёў аналіз рынку за два першыя месяцы гэтага года. Сярэдні рост цэн на тавары - нязначны. Прыкметна падаражэлі садавіна, гародніна, сланечнікавы алей і некаторыя віды круп. У той час як цэны на свініну, мяса птушкі і некаторыя віды сыроў знізіліся.
Яшчэ ў студзені Мінгандаль і Міністэрства эканомікі рэкамендавалі гандлёвым сеткам абмежаваць сваю рэнтабельнасць да 3%. Аднак буйныя гандлёвыя сеткі самі стрымліваюць рост цэн, у тым ліку і за кошт сваёй рэнтабельнасці. Так, напрыклад, у Еўраопта за першы квартал яна будзе нулявой.
Кіраўнік найбуйнейшай гандлёвай сеткі дзеліцца, рэзкага скачку цэн ім атрымалася пазбегнуць, дзякуючы эфектыўным перамовам з пастаўшчыкамі тавараў крытычнага імпарту з Еўропы - дамовіліся аб паніжэнні валютных цэн. Таксама дастаткова паспяхова стрымліваюць рост цэн на тавары, якія пастаўляюцца з Расіі. Але ў апошнія два тыдні беларускія пастаўшчыкі патрабуюць падняць закупачныя цэны на 15-30%, а часам і на 50%, матывуючы гэта паслабленнем нацыянальнай валюты.
Андрэй Зубкоў, старшыня савета дырэктараў кампаніі "Еўрагандаль":
"З такім павышэннем цэн мы згадзіцца не можам. Бо гэта выльецца ў прапарцыянальнае павелічэнне цэн тавару на паліцы. Павышэнне цэн ўзгадняецца толькі ў выпадку карэктнага абгрунтавання яе павелічэння. Прадукцыя вытворцаў патрэбна не менш гандлёвай сетцы, чым вытворцу гандлёвая паліца. А цана - вынік кампрамісу. Наша прынцыповая пазіцыя - даступныя цэны для нашага пакупніка".
Паводле слоў кіраўніка сеткі, паслабленне рубля да долара за пяць апошніх месяцаў было значным і склала 42%, але за той жа перыяд еўра падаражэў усяго толькі на 19%, а беларускі рубель у дачыненні да расійскага нават умацаваўся на 9%. Менавіта таму Андрэй Зубкоў лічыць, што рост цэн, які заяўляюць некаторыя нашы вытворцы, абсалютна неабгрунтаваны.
Зрэшты, Еўраопт заўсёды працаваў па прынцыпе - галоўнае даступныя цэны. І сёння колькасць беларускіх пакупнікоў, якія штодня наведваюць магазіны "Еўраопт", набліжаецца да мільёна. Акрамя таго, гандлёвая сетка мае намер стаць вытворцам прадуктаў харчавання ў Беларусі ў розных таварных групах і зараз працуе над прыцягненнем дадатковых інвестыцый.
Летась кампанія пералічыла ў бюджэт у выглядзе падаткаў і збораў больш за 202 мільёны долараў. Але ў два найбліжэйшыя гады "Еўраопт" пяройдзе дазволены парог у 20% і адпаведна не будзе мець права набываць і будаваць новыя гандлёвыя аб'екты. Таму кампанія шукае іншыя рынкі для развіцця. Ужо сёння ў Смаленску працуе сетка гэтага рытэйлера пад брэндам "Еўрагандаль" і пазіцыянуецца як беларуская. Значная частка асартыменту - тавары беларускіх вытворцаў. Да канца года кампанія плануе адкрыць не меней як 50 магазінаў у Расіі.
