У Беларусі пашыраюць межы свабодных эканамічных зон і магчымасці развіцця іх інфраструктуры. Адпаведны ўказ сёння падпісаў Кіраўнік дзяржавы. Дакумент дазваляе ўключаць у СЭЗ новыя зямельныя ўчасткі пад праекты, якія ўжо знайшлі інвестараў, а таксама аптымізаваць "Гроднаінвест". Указ адкрывае і магчымасці для стварэння неабходнай інфраструктуры, напрыклад, правесці ваду, газ, электрычнасць. На гэтыя мэты з гэтага часу дазволена браць крэдыты. Спрашчаецца і шэраг адміністрацыйных працэдур.
Падпісаны сёння ўказ - лагічны працяг нарады ў Кіраўніка дзяржавы два тыдні таму. На ёй абмяркоўвалі дэталі дакумента і далейшае развіццё СЭЗ. Прапановы Аляксандр Лукашэнка падтрымаў, але запатрабаваў рэалізацыю ўсіх праектаў пачаць да канца гэтага года. Мэта новаўвядзенняў - зрабіць працу эканамічных зон больш эфектыўнай. Бо сёння важна вырабляць высокатэхналагічны тавар. Усяго ў Беларусі 6 свабодных эканамічных зон - у кожнай вобласці. На іх тэрыторыях зарэгістравана больш за 400 рэзідэнтаў. Аднак доля інавацыйнай прадукцыі - менш за 10 %.
Інвестары ўжо гатовыя ўкласці ў стварэнне новых вытворчасцяў на тэрыторыях нашых СЭЗ каля 850 мільёнаў долараў. Унёсак свабодных эканамічных зон у эканоміку Беларусі істотны. Такія тэрыторыі зараз даюць 4 % ВУП краіны. СЭЗ - гэта амаль 13 % беларускай вытворчасці, 15 % экспарту і рабочыя месцы для 122 тысяч чалавек.
