Сусветны тыдзень прадпрымальніцтва сёння стартаваў у Беларусі VI Міжнародным форумам малога бізнесу.
Тэма гэтага года - інавацыйнае мышленне. Міжнародныя спікеры са Злучаных Штатаў Амерыкі, Ізраіля, Іспаніі, Чэхіі, Расіі дзеляцца вопытам па развіцці бізнесу і ўкараненні новых тэхналогій. Удзел у форуме бяруць каля 500 прадстаўнікоў органаў кіравання, міжнародных фінансавых інстытутаў, вядомыя бізнесмены, банкіры, інвестары. Гавораць аб падтрымцы бізнесу і трэндах будучыні. Банк развіцця, у прыватнасці, пашырыць крэдытную лінейку для малога прадпрымальніцтва і знізіць працэнтную стаўку да 12,5.
Уладзімір Зіноўскі, Міністр эканомікі Беларусі: "10 гадоў таму малы і сярэдні бізнес займаў у ВУП 14%, сёння 28,5%. Мы ставім амбіцыйную задачу да 2020 года выйсці на 40%. Не ўдасканальваючы заканадаўства, не дапамагаючы развіццю інстытута прадпрымальніцтва, мы ніколі не зможам дасягнуць такіх вынікаў. У нас ёсць пытанні па даванні крэдытаў для малога бізнесу, і трэба іх неяк вырашаць. У нас ёсць пытанні і да падатковай сістэмы, якую трэба ўдасканальваць".
Сусветны тыдзень прадпрымальніцтва праходзіць больш чым у 160-ці краінах, каб прыцягнуць увагу да ролі малога бізнесу ў развіцці эканомікі і грамадства. У рамках Тыдня пройдуць стартап-канферэнцыя, Дзень інвестара, мабільная лабараторыя прадпрымальніцтва.
