Беларусь стане саракавой краінай, у якой пачне працаваць Tax Free - сістэма вяртання падатку на дабаўленую вартасць. Ужо вядома, што выбралі нацыянальнага аператара, які ў найбліжэйшы час прыступіць да падпісання першых дамоў з магазінамі і банкамі.
Калі з'явяцца першыя таблічкі Tax Free на дзвярах магазінаў, даведалася Наталля Кезік.
Руслан на чэках Tax Free за сваё жыццё зэканоміў не адну сотню валюты. Малады прадпрымальнік атрымлівае грошы па чэках пасля кожнай замежнай паездкі. Выгада для яго відавочная: пятая частка выдаткаваных грошай у выглядзе ПДВ вяртаецца ў кашалёк фактычна ў дзень куплі.
Раней карыстацца Tax Free маглі толькі беларусы ў мэтах уласнай эканоміі. Аднак захаваць таўшчыню кашалька зараз змогуць і замежныя турысты, вярнуўшы туды пасля шоп-тура па Беларусі падатак на дабаўленую вартасць. Наша краіна стане саракавой у свеце, дзе паўнавартасна пачне працаваць сістэма Tax Free.
Афіцыйна Tax Free у Беларусі ўвялі ў студзені гэтага года. Працу сістэмы тармазіла адсутнасць нацыянальнага аператара - арганізатара, які ставіць свае ўмовы.
Аператара выбралі, і ўмовы гульні вызначыліся. Каб атрымаць грашовую кампенсацыю, турысту неабходна купіць тавараў мінімум на восемсот тысяч беларускіх рублёў незалежна ад колькасці тавараў у чэку. Галоўнае - здзейсніць куплю ў адзін дзень і ў адным гандлёвым пункце, дзе і аформяць спецыяльны чэк. Пры перасячэнні граніцы трэба паставіць на ім адзнаку з датай выезду. Затым атрымаць грошы ў кампаніі-аператара, якая займаецца выплатай Tax Free у яго краіне. Альбо абнаявіць чэк на граніцы.
Але ўжо зараз эканамісты мяркуюць, што эканамічны эфект у любым выпадку будзе станоўчы. Сума вернутага ПДВ заўсёды меншая за кошт набытага тавара.
Увядзенне Tax Free падабаецца не толькі міністэрству спорту і турызму. Ідэю ўжо падтрымалі мінгандлю, Мытны камітэт і Нацыянальны банк. Хутчэй за ўсё, паўнавартасна сістэма пачне працу ў Беларусі на працягу паўтара месяцаў. І першай прыкметай пачатку працы стануць значкі Tax Free на дзвярах сталічных магазінаў.
