Суд Еўразійскага эканамічнага саюза ўмацоўвае ўплыў у рашэнні самых спрэчных пытанняў паміж краінамі - удзельніцамі еўразійскай інтэграцыі. Пра гэта сёння ў Мінску заявіў кіраўнік суда Жалыбмет Баішаў. За тры гады працы Еўразійскі суд вынес амаль два дзясяткі ключавых рашэнняў. Гэта вялікая колькасць спраў для міжнароднай арганізацыі, падкрэсліваюць эксперты. Сярод надзённых задач - урэгуляванне асобных мытных норм, антыдэмпінгавых мер. Не знятае з парадку дня пытанне аб удзеле легіянераў (г.зн. замежнікаў) у нацыянальных спартыўных мерапрыемствах. Ці будуць дзейнічаць ліміты ў гэтай сферы або будзе выкананы прынцып вольнага перамяшчэння рабочай сілы, суд вырашыць у лістападзе.
Сёння Мінск аб'яднаў больш за 200 прадстаўнікоў міжнародных судоў, дзелавых колаў ЕАЭС. Эксперты абмяркоўваюць актуальныя пытанні міжнароднага правасуддзя. Галоўная задача еўразійскага судовага органа - спрыяць развіццю інтэграцыі еўразійскай "пяцёркі".
