Хлеб у спірце і замарожаныя эклеры. Сталічныя хлебазаводы развіваюць тэхналогіі. Працуе лінія па кансервацыі вырабаў. Тэрмін прыдатнасці такога прадукту павялічваецца на два тыдні, пры гэтым захоўваецца свежасць. Асвоілі і замарозку кандытарскіх вырабаў – тартоў і пірожных.
Новыя тэхналогіі дазваляюць пашырыць экспарт і тым самым павялічваюць попыт на сталічную прадукцыю.
Падрабязней - Наталля Кезік. Кансерваваць хлеб, батон і багет – спіртам. Сталічныя пекары цяпер дакладна ведаюць, як можна захаваць здобу свежай на працягу двух тыдняў. Тут асвоілі сучасную тэхналогію: падчас пакавання прадукту машына апрацоўвае пакет чыстым этылавым спіртам. І такім чынам атрымліваецца прадухіліць утварэнне цвілі.
Сёлета на прадпрыемстве ўжо рэалізавалі 150 тон закансерваванай прадукцыі. Найбольш запатрабаванымі аказаліся белыя віды хлеба - батон і багет. Прычым з вясны па восень – у дачны сезон - попыт на такую прадукцыю ўзрастае шматкроць.
Нават праз два тыдні гэты батон будзе свежым. Для яго ўжывання дастаткова адкрыць пакет і пачакаць, пакуль пары этылавага спірту знікнуць. Яны якраз і падтрымлівалі свежасць батону. Альбо, як раяць спецыялісты, прадукт можна пакласці на адну хвіліну ў мікрахвалевую печ - і свежы батон можна каштаваць. А вось каб пакаштаваць эклеры, пірожныя альбо тарты з падоўжаным тэрмінам прыдатнасці, іх прыйдзецца размарозіць. Салодкую крэмавую прадукцыю на хлебазаводзе цяпер апрацоўваюць шокавай замарозкай.
Падоўжаныя тэрміны прыдатнасці значна пашыраюць экспартны рынак для сталічных хлебазаводаў. У замежных магазінаў з’явілася магчымасць прадаваць мінскі торт як мінімум на працягу некалькіх месяцаў.
Замарожаныя ласункі і закансерваваны хлеб і батоны высока ацанілі спажыўцы Расіі, Казахстана, Грузіі, ЗША. За гэты год сталічныя хлебазаводы на экспарт рэалізавалі больш за тысячу тон замарожанай прадукцыі.
