Новы інавацыйны праект у аграпрамысловым комплексе Мінскай вобласці: Слуцкі сыраробны камбінат плануе асвоіць вытворчасць хуткарастваральнага сухога малака як неразведзенага, так і абястлушчанага. Прадукцыю (а ў планах вырабляць да 20 тон за суткі) будуць выпускаць на філіяле холдынга ў Капылі. Для гэтага пабудуюць новы цэх і закупяць абсталяванне. Дзякуючы асаблівай структуры высушаных часціц малака, а таксама крышталізацыі лактозы такі парашок можна аператыўна растварыць і перапрацаваць, напрыклад, у сыр, масла або смятану. Малако ў сухім выглядзе асабліва запатрабаванае ў Кітаі, а таксама краінах Блізкага Усходу.
Акрамя таго, у Капылі таксама плануюць выпускаць хуткарастваральныя малочныя сумесі для гарачых напояў, якія прадаюць у вендынгавых аўтаматах.
