Шахты Нежынскага горна-ўзбагачальнага камбіната ўжо гатовыя на 50 %

Істотным складальнікам нашага экспарту  з'яўляюцца калійныя ўгнаенні. Больш  за тое,   з уводам новых аб'ектаў  Беларусь зойме лідзіруючую  пазіцыю па здабычы ў свеце.  Першыя тоны калійнай руды на Нежынскім горна-ўзбагачальным камбінаце  пачнуць здабываць ужо ў 2023 годзе. Будаўніцтва завода вядзецца строга па графіку і будзе завершана ў тэрмін.  Шахты ўжо гатовыя на 50 %. Добраўпарадкоўваюць інфраструктуру.  А значыць,  актыўна развіваецца і сам Любанскі раён.

Будпляцоўку будучага  прадпрыемства ўбачыла Юлія Токар.

Новы індустрыяльны гігант на карце Беларусі. Гэта горназдабыўны комплекс, плюс узбагачальная фабрыка. Старобінскае радовішча - адно з найбагацейшых у свеце. І першыя тоны калійнай руды на паверхню выйдуць ужо ў 2023 годзе. 

Дзве шахты ўжо гатовыя на 50 %. Вертыкальныя тунэлі прасякаюць "Вольга" і "Ульяна" - аўтаматызаваныя комплексы, якія ў нетрах зямлі дасягнуць адзнакі 720 метраў. А пакуль на глыбіні  350  вядуцца працы па гідраізаляцыі. 

Адначасова з падземнымі камунікацыямі  добраўпарадкоўваюць інфраструктуру на паверхні. Ствараюцца неабходныя ўмовы для камфорту, а галоўнае - бяспекі гарнякоў. Працягваецца будаўніцтва адміністрацыйна-бытавых карпусоў, аўтатранспартнага цэха, складоў.

Адкрыццё завода дасць новы імпульс і развіццю рэгіёна. Гэта не толькі новыя 2,5 тысячы рабочых месцаў. Праведзена рэканструкцыя чыгуначнай станцыі "Урэчча", пракладаюць газаправод даўжынёй 43 кіламетры. А ў самім горадзе ўзводзяць новы жылы квартал на 330 кватэр. І першыя два дамы  здадуць ужо сёлета. 

Так, Любань становіцца цэнтрам прыцягнення маладых перспектыўных кадраў. І новай Мекай на калійным полі. 

Сустракаючыся на мінулым тыдні са старшынёй Савета дырэктараў кампаніі "Слаўкалій"  Міхаілам Гуцэрыевым, Прэзідэнт цікавіўся, якой  будзе палітыка продажаў. Бо апроч будаўніцтва горна-ўзбагачальнага прадпрыемства на поўдні Мінскай вобласці, падобны нацыянальны праект ажыццяўляецца  і ў Петрыкаве. Запуск гэтых аб'ектаў умацуе лідарства Беларусі на сусветным рынку. А ўлічваючы, што патрэбнасць у прыродных угнаеннях будзе толькі расці, важна не ствараць канкурэнцыі паміж беларускімі гульцамі. 

І папярэднія дамоўленасці - узгадняць цану на знешніх рынках - ужо ёсць. 

Міхаіл Гуцэрыеў, старшыня Савета дырэктараў ЗТАА "Слаўкалій": "Запасаў калійных угнаенняў у Беларусі хопіць на тысячу гадоў! А неўзнаўляемыя  рэсурсы важна прадаваць хутка - толькі так будзе эканамічны эфект. Мы па будаўніцтве ідзём у тэрміны. Таму для Беларусі - гэта будзе вельмі выгадна".

Новы індустрыяльны кластар - гэта і плюс да экспартнай выручкі, і дадатковыя рабочыя месцы, і штогод два мільёны калійных угнаенняў. У перспектыве прыродныя солі не толькі павялічаць ураджайнасць - павысяць якасць сельскагаспадарчай прадукцыі.