Па якіх кірунках гатовыя развіваць дзелавыя сувязі Беларусь і Эквадор, даведалася Юлія Плытнік.
Прадстаўнікі Беларусі і Эквадора сабраліся сёння на бізнес-форуме, каб наладзіць супрацоўніцтва па такіх кірунках, як турызм, кветкаводства, рэалізацыя какава-прадуктаў і шакаладу.
Цеснае супрацоўніцтва кампаній дзвюх краін пачалося яшчэ ў 2011 годзе, калі беларуская дэлегацыя наведала Эквадор. Пачатак эканамічным адносінам быў пакладзены менавіта тады. Сёння 20 эквадорскіх кампаній гатовыя прадоўжыць узаемавыгадны дыялог.
Мануэль Эчэверыя, дырэктар эквадорскай кампаніі: Мы як прадстаўнікі Эквадора прыбылі сюды ў першую чаргу з мэтамі эканамічнымі. І для таго, каб прасунуць наш тавар на беларускім рынку. Тут прысутнічаюць прадстаўнікі шматлікіх эквадорскіх кампаній, якія зацікаўленыя ва ўсталяванні двухбаковых адносін у сферы камерцыі.
Наталля Нікандрава, намеснік дырэктара Беларускай гандлёва-прамысловай палаты: Тая прадукцыя, якая прывозіцца ў Беларусь з Эквадора, яна па прычыне адсутнасці адпаведнага клімату ў Беларусі і па прычыне адсутнасці выхаду да мора не вырабляецца ў нас. Гэта кветкі, садавіна, морапрадукты розныя. Калі гаварыць пра тое, што мы можам прапанаваць Эквадору, тут у нас вельмі шырокія магчымасці.
У спісе нашых прапаноў - дрот з чорных металаў, гэта асноўная доля экспарту, геадэзічнае абсталяванне, вылічальная тэхніка і электраабсталяванне.
Сённяшні бізнес-форум - гэта першыя крокі ў супрацоўніцтве Беларусі і Эквадора. Аб падпісанні дагавораў пакуль гаварыць рана. Краіны толькі пазнаюць адна адну.
