Удзел у найбуйнейшым аграпрамысловым форуме прыме каля 600 кампаній амаль з 30 краін. На адкрытай пляцоўцы прапануюць узоры сучаснай і рэтратэхнікі, дасягненні селекцыянераў і жывёлагадоўцаў. У крытым павільёне размесціцца выставачна-дэгустацыйная пляцоўка з прадуктамі харчавання, у тым ліку і з арганічнай прадукцыяй.
Уладзімір Гракун, намеснік міністра сельскай гаспадаркі і харчавання Беларусі: "Будуць прадстаўленыя вытворцы, сама прадукцыя і арганізавана дэгустацыя. Мы працуем для таго, каб фермерскія гаспадаркі ўключаліся ў гэту працу і гэтай прадукцыі было больш. Каб мы задаволілі попыт і насельніцтва РБ і мелі экспартны патэнцыял".
У праграме дэманстрацыя тэхнікі, майстар-класы і конкурсы. Выстава стартуе ў аўторак, 4 чэрвеня. Яна размесціцца на пляцоўках гандлёва-лагістычнага цэнтра "Глобус Парк" у Шчомысліцы. Ад станцыі метро "Малінаўка" будуць курсаваць бясплатныя аўтобусы. Уваход на выставу свабодны.
