Пастаўкі расійскай нафты ў Беларусь прыпыненыя. Але як нам паведамілі ў Белнафтахіме, наваполацкі "Нафтан" і Мазырскі НПЗ працягваюць працаваць на назапашаных у снежні запасах сыравіны. Загрузка прадпрыемстваў зніжаная да мінімальна магчымага ўзроўню, каб забяспечыць унутраныя патрэбнасці. Прыпынены толькі экспарт нафтапрадуктаў.
Нагадаем, кантракт на пастаўку расійскай нафты ў нашу краіну пакуль не падпісаны і адгрузка спынена 1 студзеня. Бакі не могуць дамовіцца аб цэнах, тарыфах на транзіт, кампенсацыі за падатковы манеўр. У канцэрне "Белнафтахім" цяперашнюю сітуацыю назвалі не лепшым этапам у эканамічным супрацоўніцтве з расійскімі партнёрамі. Асабліва на фоне рэалізацыі чарговага этапу падатковага манеўру ў Расійскай Федэрацыі.
І як заяўляе найбуйнейшых аператар аўтазаправачных станцый "Беларуснафта", дэфіцыту паліва ў Беларусі не чакаецца. Ажыятажу з боку вадзіцеляў на запраўках няма. Уся сістэма працуе стабільна, у штатным рэжыме.
У Белнафтахіме адзначылі, што перамовы аб пастаўцы нафты расійскімі кампаніямі працягваюцца. Напярэдадні Прэзідэнт Беларусі даў даручэнне забяспечыць ужо ў найбліжэйшыя дні пастаўку нафты ў краіну з альтэрнатыўных крыніц. Перш за ўсё чыгуначным транспартам з партоў на Балтыцы. Разглядаюцца і іншыя варыянты.
Профільныя ведамствы пракаменціравалі сітуацыю з прыпыненнем пастаўкі расійскай нафты ў Беларусь
3 января 2020
