Знакавы дакумент для завяршэння працы пятага склікання беларускага парламента. Сёння ён адкрыў восеньскую сесію. 11 кастрычніка яго зменіць ужо шосты. За тыдзень Палата прадстаўнікоў і Савет Рэспублікі збіраюцца разгледзець 26 законапраектаў. Частка з іх - міжнародныя ратыфікацыі і змяненні ў дзеючыя законы.
Што абмяркоўвалі ў першы дзень працы і за што галасавалі, ведае Святлана Лук'янюк. Авальная зала за паўгадзіны да адкрыцця восеньскай сесіі. Гэтыя крэслы сёння зоймуць яшчэ дэпутаты пятага склікання. Яны на пасадзе яшчэ тыдзень. У наступны аўторак іх зменіць шосты склад Палаты прадстаўнікоў, за які мы галасавалі 11 верасня.
Але да гэтага часу ў дэпутатаў важная місія - разгледзець праект бюджэту на наступны год. Яны над ім працавалі, ім і прымаць. Разлікі па расходах і даходах узятыя, гавораць, з рэалій.
На 2017-ы заклалі цану на нафту не ніжэйшую чым 35 долараў за барэль, а курс расійскай валюты да амерыканскай - 75. Стаўка рэфінансавання 15-17%.
Рост ВУП стрыманы - 0,2%. Рэальнаму сектару трэба вучыцца працаваць у плюс. Ад мадэрнізацыі чакаюць росту продажаў і новых рынкаў збыту. І будуць скарачаць неэфектыўныя крэдытныя праекты.
Колькі заробім, столькі і будзем траціць. Грошай менш атрымаюць АПК і будаўнічы сектар.
А вось ахова здароўя, адукацыя і культура ў прыярытэце. Фінансавання з дзяржказны яны атрымаюць больш, чым сёлета. Чакаем і росту зарплат бюджэтнікаў на 9%. На павышэнні могуць разлічваць і пенсіянеры.
Фонд сацабароны ў наступным годзе фарміруюць толькі страхавыя выплаты. Значыць, чым больш занятых у эканоміцы, тым больш грошай.
Дзяржказну плануюць з прафіцытам на паўтара мільярда рублёў. Грошы пойдуць на пагашэнне дзярждоўгу. Гэтаму праекту бюджэту сёння дэпутаты сказалі так. Такога ранняга разгляду чакалі і многія арганізацыі.
Ужо ў сераду праект бюджэту разгледзяць у Палаце прадстаўнікоў у другім чытанні, а ў чацвер - у Савеце Рэспублікі.
