Замежны спажывец усё часцей выбірае беларускую якасць. Вось, напрыклад, прадукцыю фабрыкі "Спартак" напярэдадні ацанілі госці з Кітая. Дэлегацыя ў рамках двухбаковага ўзаемадзеяння наведала нашу краіну. І зараз беларускія вытворцы плануюць прыняць удзел у міжнароднай выставе ў Шанхаі, дзе і прадэманструюць поўны асартымент прадукцыі. Як асвойваюць новыя рынкі збыту - у рэпартажы Вольгі Халадовіч.
Беларускі шакалад пакарае Паднябесную. Кандытарская фабрыка "Спартак" прэзентавала сваю прадукцыю гасцям з Кітая прама пасля прылёту ў Нацыянальным аэрапорце Мінск. Удзельнікі дэлегацыі спрабавалі прысмакі, вялі перамовы аб супрацоўніцтве.
Валерый Таран, начальнік упраўлення продажаў і перспектыўнага развіцця СП ААТ "Спартак": "Мы накіроўваем узоры, актыўна вядзём перапіску, маем добрыя двухбаковыя сувязі. Менавіта для таго, каб пазіцыянаваць правільны прадукт, каб ён знайшоў водзыў на кітайскім боку".
Чэн Чон, гандлёва-эканамічны прадстаўнік кітайскай правінцыі Цзянсу ў РФ: "Я быў на фабрыцы "Спартак" у Гомелі. Там фабрыка з самым новым і сучасным абсталяваннем. Усё нямецкае, імпартнае. І там прадукцыя вельмі розная і смачная, вельмі добрая. Я думаю, што цукеркі і шакалад, калі прыйдуць на кітайскі рынак, гэта будзе выдатна, таму што кітайскі рынак вельмі вялікі".
Шакалад, цукеркі, батончыкі, пячэнне, тарты і пірожныя. Усяго на фабрыцы выпускаюць 350 найменняў кандытарскіх вырабаў. Сёння "Спартак" - найбуйнейшы вытворца прысмакаў у Беларусі.
Паўтоны батончыкаў-мюслі за гадзіну з персікам, вішняй і журавінамі. Ужо сёння яны будуць на паліцах магазінаў.
Новая аўтаматызаваная лінія - вынік праграмы тэхнічнага пераўзбраення. Як і новы від упакоўкі Flow-pack. Яна забяспечвае герметычнасць і поўную ізаляцыю ад навакольнага асяроддзя, захоўвае смакавыя якасці і павялічвае тэрмін захоўвання. Пастаянная мадэрнізацыя - адметная асаблівасць і вынік прыбытковай працы прадпрыемства.
Алег Жыдкоў, генеральны дырэктар СП ААТ "Спартак": "У планах мадэрнізацыі прадпрыемства на 2015 год стаіць кардынальная мадэрнізацыя вафлевай вытворчасці з запускам новага цэха. У нас ёсць яшчэ планы па мадэрнізацыі, у тым ліку і бісквітнай вытворчасці. Мы сёння вырабляем не толькі традыцыйныя шакалад і шакаладныя цукеркі, фабрыка спецыялізуецца на вытворчасці вафлевых вырабаў, бісквітных вырабаў і карамельных вырабаў, таму мы кожнаму ўчастку імкнёмся надаваць належную ўвагу".
Прыкладна 20% сваёй прадукцыі "Спартак" адпраўляе на экспарт. Беларускія прысмакі ведаюць больш як у 15 краінах свету. Асноўныя пакупнікі - Расія, Азербайджан, Манголія і ЗША. На чарзе - дагавор аб пастаўках з Кітаем.
