Пры вытворчасці беларускіх сыроў, смятаны і тварагу з гэтага часу будзе выкарыстоўвацца айчынная закваска. Сёння ў Інстытуце мясамалочнай прамысловасці Акадэміі навук адкрыўся цэх па вытворчасці глыбоказамарожаных бакканцэнтратаў. Раней закваску для малочнай прамысловасці Беларусь імпартавала на 100%. У такіх аб'ёмах дапамога замежных калег больш не спатрэбіцца. Вырабляць кампанент стануць шляхам глыбокай замарозкі пры тэмпературы мінус 195 градусаў. Ужо праз два гады цэх зможа забяспечыць каля 60% беларускага рынку.
Уладзімір Гусакоў, старшыня прэзідыума НАН Беларусі: Гэта прарыў для нашай краіны. Закваскі да гэтага былі імпартнымі. Прыкладна 150 мільярдаў рублёў штогод складаў імпарт па гэтых напрамках. Але мы не толькі ставім задачу імпартазамяшчэння, але і пасоўвання на рынкі Мытнага саюза. А ў будучыні і далей.
Затраты на высокатэхналагічную вытворчасць склалі каля 65 мільярдаў рублёў. Тэрмін акупнасці праекта - 5 гадоў.
