Першы Форум рэгіёнаў Беларусі і Украіны сабраў у Гомелі каля 700 удзельнікаў

25 Кастрычніка 2018

Міжнароднае мерапрыемства ўжо назвалі перазагрузкай супрацоўніцтва дзвюх краін на рэгіянальным узроўні. Па выніках двухдзённых перамоў у самых розных галінах чакаецца падпісанне кантрактаў на прыкладную суму ў 60 мільёнаў долараў. У першы дзень форуму адбылося 13-е пасяджэнне беларуска-ўкраінскай рабочай групы па павелічэнні ўзаемнай прысутнасці на рынках Беларусі і Украіны сельскагаспадарчай, харчовай і іншай прадукцыі. Для прыкладу: толькі за 8 месяцаў гэтага года тавараабарот па гэтай лініі склаў больш як паўмільярда долараў. А гэта плюс 23% да таго ж леташняга перыяду. І ўсё ж пэўныя перашкоды ў выкарыстанні рэзерваў ёсць. Адна з іх - ва Украіне тэхнічныя нормы і рэгламенты распрацоўваюцца ў адпаведнасці са стандартамі Еўрасаюза, а ў Беларусі - Еўразійскага эканамічнага саюза. Паміж тым, і тут, паводле слоў удзельнікаў пасяджэння, можна знайсці кампраміс.

Іван Смільгін, намеснік міністра сельскай гаспадаркі і харчавання Беларусі: "Па выніках сустрэчы мы бачым, што ў нас ёсць рэзервы, канкрэтныя рэзервы ў самых розных галінах жывёлагадоўлі, раслінаводства для падтрымання такой добрай прысутнасці нашых тавараў на рынках абедзвюх краін".

Віктар Шарамет, намеснік міністра аграрнай палітыкі і харчавання Украіны: "Тыя перашкоды, якія ў нас існавалі, мы вось абгаварылі з Іванам Іванавічам у складзе групы, і знайшлі шляхі, як іх вырашаць. Таму з нашага боку будзе зробленая зялёная вуліца, каб тавары прасоўваліся ў адзін і ў другі бок".

Плануецца, што заўтра ўдзел у форуме прыме Прэзідэнт Беларусі Аляксандр Лукашэнка. Чакаецца, што мерапрыемства таксама наведае кіраўнік Украіны Пётр Парашэнка. Да ўдзелу і выступленняў на асноўнай пляцоўцы форуму кіраўнікі дзяржаў правядуць сустрэчу ў фармаце сам на сам. Асноўны акцэнт падчас перамоў будзе зроблены на пытаннях развіцця гандлю, эканамічнага і інвестыцыйнага супрацоўніцтва дзвюх краін праз прызму патэнцыялу прамых кантактаў на ўзроўні рэгіёнаў.