Парк высокіх тэхналогій уваходзіць у новы год з рэкордна высокімі паказчыкамі. Экспарт на ўзроўні двух мільярдаў долараў, больш як 750 кампаній і 58 тысяч працаўнікоў, кожны з якіх плаціць у 3 разы больш падаткаў, чым сярэдні заняты ў эканоміцы.
2019-ы стаў па-сапраўднаму прарыўным і ў адносінах Беларусі і Кітая. Сёлета мы павялічылі тавараабарот на чвэрць! Ён перасек рэкордную адзнаку ў 4 мільярды долараў. Паказальны поспех нашага галоўнага сумеснага праекта - Кітайска-Беларускага індустрыяльнага парку ў Смалявіцкім раёне.
У 2020-ы "Вялікі камень" увойдзе з добрым прыбыткам у сваёй і так немаленькай індустрыяльнай сям'і - ужо 60 рэзідэнтаў з усяго свету выбралі наш парк як перспектыўнае месца для развіцця бізнесу.
Кампаніі з вядомымі імёнамі ў сферах IT, медыцыны, машынабудавання, нанатэхналогій ужо пачалі працу ў "Вялікім камені", і ў наступным годзе не менш як 30 прадпрыемстваў выпусцяць першую прадукцыю.
Проста на вачах "Вялікі камень", дзе нашы журналісты бываюць з зайздроснай рэгулярнасцю (і, балазе, інфападстаў хапае), ператвараецца ў новы сучасны горад. Апроч офісаў, выставачнага цэнтра, гасцініцы і рэстарана кітайскай кухні, у першы жылы дом парка ўжо засяляюцца навасельцы.
Аб парках, якія рухаюць эканоміку толькі наперад, раскажа Надзея Сербіненка.
Індустрыяльны парк "Вялікі камень" - найбуйнейшы сумесны праект Беларусі і Кітая. Першыя будаўнічыя працы тут, на пляцоўцы ў Смалявіцкім раёне, пачаліся ў 2015-м. І за гэтыя 4 гады парк прыкметна змяніўся.
З'явіліся свае вуліцы, праспекты, офісны будынак, лагістычны і экспацэнтр, а яшчэ ўласны рэстаран і першы арэндны дом. Зараз паглядзім, як усё гэта працуе.
У парку ўжо працуюць шэсць вытворчасцяў. Адна з самых буйных - кітайска-беларуская кампанія "МАЗ-Вейчай".
Яшчэ адзін магутны драйвер беларускай эканомікі - Парк высокіх тэхналогій. 2019-ы стаў прарыўным для ПВТ. Толькі ў гэтым снежні ў парку зарэгістравана 80 новых кампаній.
Будынак ПВТ лёгка пазнаць: ён стаіць на кальцавой дарозе, і каля яго заўсёды раздзімаюцца флагі з лагатыпамі вядомых сусветных брэндаў: "Яндэкс", Viber, Epam і іншыя.
Прыняты Кіраўніком дзяржавы восьмы дэкрэт сур'ёзна паспрыяў развіццю парка, у тым ліку пазнавальнасць нашай IT-сферы за мяжой. Толькі гэтым летам у парку пабывалі адразу 3 прэзідэнты, а за год - больш як 140 замежных дэлегацый.
Беларускі Парк высокіх тэхналогій з'яўляецца адным з найбуйнейшых IT-кластараў у Цэнтральнай і Усходняй Еўропе. Сёння ПВТ аб'ядноўвае 750 кампаній, у якіх працуюць каля 60 тысяч чалавек.
Дзякуючы ПВТ Беларусь значна апярэджвае Расію, ЗША, Кітай, Японію, Паўднёвую Карэю па экспарце камп'ютарных паслуг на душу насельніцтва. Экспарт ПВТ - гэта больш як 20% усяго экспарту паслуг краіны.
А якім адыходзячы 2019-ы стаў для ПВТ з эканамічнага пункта гледжання? Чаго атрымалася дабіцца? Спытаем у дырэктара ПВТ Усевалада Янчэўскага (відэа).
Парк высокіх тэхналогій увойдзе ў 2020 год з рэкордна высокімі паказчыкамі
29 декабря 2019
