Ад эканомікі да барацьбы з тэрарызмам. Вынікі саміту СНД

Ад эканомікі да барацьбы з тэрарызмам. Менавіта такі шырокі спектр пытанняў напярэдадні ў Ашхабадзе абмеркавалі лідары краін СНД. Дыскусія атрымалася вельмі грунтоўнай. Адзін з галоўных дакументаў, які прыняты на Савеце кіраўнікоў дзяржаў, - дэкларацыя аб стратэгічным эканамічным супрацоўніцтве.

Яна накіраваная на пашырэнне ўзаемнага гандлю і ўмацаванне эканомік СНД. Пра гэта часта гавораць на еўразійскай пляцоўцы, актуальна гэта і для Садружнасці. Якраз на гэтую тэму выказаўся наш Прэзідэнт і заклікаў калег развіваць эканоміку разам, бачыць стратэгію на найбліжэйшы час. Рэзервы ўнутранага рынку не вычарпаныя, вялікі патэнцыял у нас саміх - у прамысловай кааперацыі, у стварэнні новых вытворчасцяў. Менавіта такія маштабныя праекты і патрэбныя Садружнасці ў будучыні. Толькі разам можна выстаяць, калі свет чарговы раз затрасе ў эканамічнай турбулентнасці. Зрэшты, да адзінства дзяржавы падштурхоўваюць і ўрокі агульнай гісторыі. Дарэчы, лідарамі падпісаны зварот да народаў краін СНД і сусветнай грамадскасці ў сувязі з 75-годдзем Перамогі ў Вялікай Айчыннай. Важна знайсці сферы, якія нас аб'ядноўваюць сёння, а не ствараць бар'еры. Тым больш што зараз хапае выклікаў: апроч эканамічных перыпетый хвалююць усплёскі тэрарызму, рост напружанасці ў Еўропе. Ды і на прасторы Садружнасці застаюцца замарожаныя канфлікты. На гэтыя праблемы афіцыйны Мінск зважае сусветнай грамадскасці на самых розных форумах і прапаноўвае крокі для гарантавання бяспекі. 

Выклік дзяржавам і цэлым рэгіёнам сёння кінуты і кіберзлачынцамі - ад лакальных крадзяжоў інфармацыі да маштабных сацыяльных атак. Важна ўмацоўваць бяспеку і ў глабальнай сетцы. У гэтай сувязі актуальнай бачыцца падтрымка беларускай ініцыятывы аб поясе лічбавага добрасуседства. 

Усе гэтыя меседжы прагучалі вельмі своечасова, лічаць палітолагі і журналісты. Да саміту лідараў СНД была прыкавана вялікая ўвага і медыясупольнасці, і аналітыкаў. Эксперты з розных краін Садружнасці адзначаюць канструктыўную пазіцыю Мінска і нацэленасць на дыялог і развіццё.

Аляксей Пілько, дырэктар Еўразійскага камунікацыйнага цэнтра: "Сапраўды, замарожаных канфліктаў на постсавецкай прасторы ўжо нямала, гэта Данбас, Прыднястроўе, Нагорны Карабах, і неяк трэба знаходзіць іх рашэнні. І найболей актуальнае пытанне - гэта праблемы Данбаса. Спадзяюся, што зараз адбудзецца развядзенне бакоў і пачнецца, паводле мінскіх пагадненняў, працэс урэгулявання канфлікту".

На палях саміту Аляксандр Лукашэнка правёў шэраг двухбаковых перамоў з лідарамі Туркменістана, Кыргызстана, Казахстана і Азербайджана. У наступным годзе старшынства ў СНД пяройдзе да Узбекістана. А дапаможа Ташкенту афіцыйны Мінск. Зверыць гадзіннікі ў нефармальнай атмасферы кіраўнікі дзяржаў дамовіліся перад Новым годам у Санкт-Пецярбургу.