"Адзін пояс - адзін шлях". Да міжнароднага форуму ў Кітаі павышаная ўвага

Беларусь актыўна ўмацоўвае сувязі ў еўразійскім напрамку. Ужо ў найбліжэйшыя дні ў Пекіне адбудзецца другі форум міжнароднага супрацоўніцтва "Адзін пояс - адзін шлях". У кітайскую сталіцу прыбудзе і прадстаўнічая дэлегацыя нашай краіны. Ужо сёння ў дачыненні  да Беларусі ў навінах найбуйнейшых кітайскіх СМІ сталі з'яўляцца загалоўкі: "Галоўны сухі порт шаўковай магістралі"  і "Гістарычны максімум ва ўзаемным гандлі". Прычына інфармацыйнага ўсплёску - і маючая адбыцца сустрэча лідараў дзвюх краін падчас форуму. Курс на стратэгічнае партнёрства абазначаны даўно. Яшчэ ў маі 2015 года падчас візіту ў нашу краіну  Старшыня КНР Сі Цзіньпін адзначыў унікальныя перавагі Беларусі з пункта погляду геаграфічнага становішча і выказаў надзею, што Кітайска-беларускі індустрыяльны парк "Вялікі камень" можа стаць жамчужынай эканамічнага пояса паміж усходам і захадам. 

Як кітайскі мегаполіс рыхтуецца да маштабнага форуму? Эксклюзіў для "Панарамы" падрыхтаваў наш карэспандэнт у Кітаі Ян Пашкевіч.

Маючы адбыцца форум запусціў інфармацыйную хвалю не толькі па вуліцах Пекіна - перспектывы глабальнай гандлёвай шаўковай сеткі ў топе навін і сеткі інфармацыйнай. Кіраўнік МЗС Кітая міністр Ван І першым прыадкрыў заслону саміту - апгрэйд "Шаўковага шляху" да версіі 2.0 будуць праводзіць гуртам. Форум збярэ прадстаўнікоў 150 краін, у тым ліку амаль 40 сусветных лідараў, сярод якіх і наш Прэзідэнт.

І нават сярод такой навінавай буры на грэбні хвалі апынулася і Беларусь. 

Свой "шаўковы шлях", толькі ўжо багаты на гарачыя навіны, журналісты буйных кітайскіх СМІ праклалі ў пасольства нашай краіны. Згодна з беларускай традыцыяй, прэс-канферэнцыю сабралі за сталом з беларускімі пачастункамі. У тым ліку і яны сталі часткай беларуска-кітайскага прарыву - летась узаемны гандаль паміж краінамі ўзняўся  на небывалую вышыню - 4,5 млрд долараў.

 У топе  тэм, якія абмяркоўваюцца, - адкрыццё ўжо ў наступным месяцы першага IT-магазіна беларускіх тавараў у Кітаі, пагадненне аб узаемным прызнанні дыпломаў аб вышэйшай адукацыі, што рыхтуецца ўрадамі абедзвюх краін да падпісання, і, вядома ж, сустрэча Аляксандра Лукашэнкі са старшынёй КНР Сі Цзіньпінам. Яна пройдзе 25 красавіка - у першы дзень працы форуму.

Такім чынам пасля саміту ў новым шаўковым поясе перапляцецца яшчэ больш гандлёвых нітак, а ўпрыгожаць яго новыя нацыянальныя ўзоры. Сёння сусветная ініцыятыва ўжо аб'яднала 60 краін свету, і рух па сусветнай гандлёвай магістралі толькі набірае хуткасць.