Сёння ў рамках юбілейнай сесіі Генеральнай канферэнцыі МАГАТЭ адбыліся навучальныя мерапрыемствы ў Цэнтры па інцыдэнтах і аварыйных сітуацыях. Правялі іх групы міжнародных экспертаў у галіне аварыйнай гатоўнасці. Удзел у іх прынялі і беларусы. Як рыхтуюць спецыялістаў для будучай атамнай электрастанцыі, і хто зацікавіўся беларускімі распрацоўкамі ў радыяцыйнай медыцыне. З Вены перадае Вераніка Бута.
Сёння Цэнтр па аварыйных сітуацыях МАГАТЭ - гэта вялікая арганізацыя, якая працуе 24 гадзіны за суткі, сем дзён на тыдзень, тут дзяжураць спецыялісты, гатовыя адрэагаваць на любы інцыдэнт у любым месцы свету. Цэнтр валодае базай больш чым з 400 кантактаў у 173 дзяржавах і арганізацыях.
Менавіта сюды прыходзіць запыт аб дапамозе, спецыялісты цэнтра звязваюць тых, каму гэтая дапамога неабходная, з тымі, хто яе можа аказаць найболей аператыўна - у лічаныя гадзіны пасля інцыдэнту.
За ядзерную бяспеку кожная дзяржава, якая развівае атамную энергетыку, адказвае самастойна. Пытанне аб своечасовасці, поўнасці і нават праўдзівасці інфармацыі. Беларусь неаднаразова даказвала сваю адкрытасць у пытаннях будаўніцтва АЭС. Дэлегацыі з нашай краіны - частыя госці штаб-кватэры МАГАТЭ і, у прыватнасці, цэнтра па надзвычайных здарэннях. І па сваёй ініцыятыве беларуская дзяржава ўжо звярнулася да міжнароднага агенцтва з просьбай праверыць аварыйную гатоўнасць будучай атамнай электрастанцыі.
Яшчэ адзін важны кірунак, па якім актыўна працуюць Беларусь і МАГАТЭ - падрыхтоўка кадраў. Гэта пытанне, якое выйшла далёка за рамкі вялікай генканферэнцыі. Адукацыя толькі па міжнародных стандартах - як у тэорыі, так і ў практыцы. У рамках супрацоўніцтва з міжнародным агенцтвам у навучальна-трэніровачным цэнтры БелАЭС укаранёная спецыяльная навучальная сістэма.
Беларусь як заснавальнік МАГАТЭ і адзін з самых актыўных удзельнікаў у рэалізацыі яго праектаў выступае ўжо і ў якасці настаўнікаў. Не толькі ў пытаннях будаўніцтва АЭС - аб кансультацыях папрасілі прадстаўнікі Бангладэш, але і ў пытаннях медыцыны нашымі напрацоўкамі зацікавілася Японія.
Акрамя таго, цесныя кантакты Беларусь падтрымлівае з Францыяй, Нарвегіяй, ЗША і іншымі краінамі. Аб тым, што цікавасць да нас як будучай ядзернай дзяржавы ёсць, гаворыць і тое, што тут, у Венскім міжнародным цэнтры, наш стэнд - адзін з самых ажыўленых. Да гэтага часу тут ужо пабывалі сотні спецыялістаў з Еўропы, Азіі і Амерыкі.
