Новы мост узвялі за кароткі тэрмін як падарунак да 7 Лістапада

Час падарункаў працягваецца. Дарыць іх да 7 Лістапада добрая традыцыя, якую наша краіна запазычыла з савецкага мінулага. Бо чаму б з тых пор не ўзяць усё самае лепшае?! З гэтым тэзісам пагодзяцца беларусы з усіх куткоў рэспублікі, якія ў гэты перадсвяточны тыдзень атрымліваюць самыя розныя падарункі. Гэта і мадэрнізаваныя вытворчасці (а значыць і рабочыя месцы), і абноўленыя бальніцы (а гэта самае важнае - здароўе), і дзіцячыя сады (бо юныя беларусы - наша будучыня), і многае іншае. Зрэшты (і пра гэта не раз гаварыў Прэзідэнт), усё, што ствараем у нашай краіне, - для дзяцей, бо ад іх залежыць, якой будзе Беларусь. 6 лістапада ў календары падарункаў адзначыцца падзеяй маштабнай, гістарычнай і вельмі важнай для тых, хто жыве на поўдні Беларусі. Гэты дзень больш за ўсё чакалі жыхары Жыткавічаў і Турава. Два горады зараз злучыць новы надзейны мост. Не толькі транспартная артэрыя, а аб'ект, які мае стратэгічнае значэнне для цэлых раёнаў. Калі летась у снежні старая пераправа дала расколіну і была закрыта, жыццё двух гарадоў паралізавала. Трапіць з аднаго берага на другі можна было толькі ў аб'езд, а гэта 300 кіламетраў. Пакінуць людзей адзін на адзін з гэтай бядой наш Прэзідэнт не мог. Сітуацыя адразу ж была ўзятая пад кантроль. За ўсімі этапамі будаўнічых работ уважліва сачыла і Агенцтва тэленавін. Напярэдадні ў нашым эфіры выйшаў праект "На кантролі Прэзідэнта". Новы мост узвялі за самыя кароткія тэрміны. Пры гэтым некаторыя работы праводзіліся ўпершыню ў краіне, і беларускія інжынеры даказалі: могуць справіцца з задачамі любой складанасці. Давайце ўспомнім, як гэта было!