Захаваецца трэнд на паніжэнне працэнтных ставак па крэдытах як для рэальнага сектара эканомікі, так і для насельніцтва. Сёння кіраўніцтва Нацбанка адказала на пытанні журналістаў. Гаварылі пра асноўныя кірункі крэдытна-грашовай палітыкі краіны. Асноўныя лічбы і арыенціры - у нашага карэспандэнта Святланы Лук'янюк.
З мая Нацбанк знізіў стаўку рэфінансавання і зараз яна - 22% гадавых. Але далей рухацца ў гэтым кірунку рэгулятар не спяшацца. Гэта негатыўна можа адбіцца на дэпазітах, ёсць рызыка адтоку банкаўскіх укладаў. Калідор на год па стаўцы - 21-24%. Зрэшты, і вялікага прыросту дэпазітаў да канца года чакаць не варта. Тут прычына - у невысокіх фінансавых магчымасцях. Хоць сёння станоўчая дынаміка ёсць.
Тарас Надольны, першы намеснік старшыні ўпраўлення Нацбанка Беларусі: "Па выніках першага квартала прырост безадзыўных укладаў склаў 20%. Павелічэнне ідзе і па валютных, і па рублёвых укладах, удзельная вага доўгатэрміновых дэпазітаў па валюце складае 37%, па рублях - 9%".
Рэгулятар захавае трэнд на паніжэнне інфляцыі, за год яна павінна быць не больш як 12%, і ставак па крэдытах. Хоць тут галаўны боль - праблемныя актывы і высокая доля выдадзеных незваротных ільготных крэдытаў. Але, у цэлым сітуацыя з выплатай даўгоў кіравальная. Падтрымка эканомікі захаваецца, але толькі з паступовым паніжэннем ставак.
Павел Калаур, старшыня праўлення Нацбанка Беларусі: "Уздзейнічаючы такім чынам на чаканні, мы паэтапна спрыяем памяншэнню рызыка-прэміі, якую закладваюць насельніцтва і прадпрыемствы пры размяшчэнні грашовых сродкаў у банках".
Золатавалютныя рэзервы з пачатку года дадалі. За красавік павялічыліся на 37 мільёнаў долараў. Зараз гэта больш чым 4 мільярды 200 мільёнаў. Пры гэтым знешнія пазыкі ўсе выплачаныя. Але рэгулятар лічыць, гэты ўзровень не дастатковым.
Павел Калаур, старшыня праўлення Нацбанка Беларусі: "Нейкі мінімальны ўзровень для Беларусі - 10 мільярдаў долараў. Гэты ўзровень задаволіў бы рэйтынгавыя агенцтвы і дазволіў бы ажыццяўляць запазычанні на знешніх рынках па меншых стаўках, чым мы гэта робім зараз".
Пытанне, якое сёння на слыху, - дэнамінацыя з 1 ліпеня. Гатоўнасць ужо на 90%. Але пераход усё ж паступовы. Купюры старога і новага ўзору будуць знаходзіцца ў абароце паўгода. Новыя ж годнасцю 500 рублёў адразу ў абарот не пойдуць. Рэгулятар за безнаяўны разлік такіх сум.
Галоўнай сваёй задачай сёння рэгулятар бачыць забеспячэнне фінансавай стабільнасці і гібкае курсаўтварэнне.
Цяперашні склад праўлення Нацбанка на пасадзе ўжо амаль 500 дзён. На 10 мая выпадае гэтая дата. Галоўнай задачай у працы называе павышэнне даверу да беларускага рубля. Праўда, удакладняе, гэты працэс не аднаго дня. І справа тут не толькі ў эканоміцы, але і ў псіхалогіі людзей.
