Нацыянальны банк не выключае магчымасці далейшага паніжэння стаўкі рэфінансавання сёлета. Яе ўзровень можа апусціцца да гістарычнага мінімуму 10 працэнтаў. Аб гэтым сёння ў інтэрв'ю нашаму тэлеканалу заявіў намеснік старшыні Нацбанка Сяргей Калечыц. Ён адзначыў, рэзервы для падзення ключавой стаўкі захоўваюцца, але тэмпы яе паніжэння будуць паменшаныя. Галоўны арыенцір у прыняцці рашэння - узровень інфляцыі. Чакаецца, што рост цэн па выніках года змесціцца ў прагноз. Ён не перавысіць 6 працэнтаў. Ужо сёння ў краіне абноўлены мінімальны ў гісторыі парог інфляцыі. У гадавым выразе гэта 4,4 працэнта.
Сяргей Калечыц, намеснік старшыні праўлення Нацбанка Беларусі: "Аналізуючы сённяшні ўзровень ставак, хоць ён блізкі да раўнаважкага, мы бачым, што пэўныя магчымасці для невялікага паніжэння ставак у бягучым годзе ёсць. У наступныя гады, напэўна, гэтыя магчымасці пашырацца і захаваюцца. Да канца бягучага года мы чакаем паніжэння стаўкі рэфінансавання да 10-10,25%. Гэта паўплывае на паніжэнне, вядома ж, ставок па новых крэдытах у банках у беларускіх рублях. Наш прагноз - стаўкі да канца года будуць знаходзіцца на ўзроўні 11 - 11,25% гадавых".
Сёння стаўка рэфінансавання трымаецца на ўзроўні дзесяці з паловай працэнта. Пытанне яе далейшага руху будзе разгледжана на найбліжэйшым пасяджэнні праўлення Нацбанка 20 чэрвеня.