На нарадзе ў Прэзідэнта абмяркоўвалі адразу 7 вялікіх рашэнняў

9 Сакавіка 2020
Гарантыі для супрацоўнікаў прадпрыемстваў, якія знаходзяцца на мяжы банкруцтва. Збор і перапрацоўка другаснай сыравіны. Свой электрамабіль з ільготамі  і рэспубліканскай сістэмай падзарадкі. Сёння ў Прэзідэнта абмяркоўвалі адразу 7 вялікіх рашэнняў. І кожнае з іх  закранае нас з вамі напрамую. У шырокім складзе пралічылі ўсе за і супраць навацый. Акрамя тых, што назвалі вышэй, гэта яшчэ абнаўленне натарыята, кантроль за ўтрыманнем агратэхнікі, нормы бяспошліннага ўвозу для грамадзян і прэміраванне мясцовай улады. Заахвочваць калі і будуць, то адрасна. Напрыклад, калі раён або горад спрацуе лепш за  вобласці ў сярэднім. Як паказала нарада, па большасці пытанняў патрэбна дадатковая экспертыза, праца парламентарыяў або прыўнясенне лепшага савецкага вопыту. Як па той жа зялёнай эканоміцы. Успомніце, як збіралі шклатару. Можа, не варта адразу выдаткоўваць мільёны на тараматы? Улада, бачачы за кожным рашэннем цікавасць грамадства, не спяшаецца ламаць дзеючыя сістэмы. Размова, хутчэй, аб мадэрнізацыі. Пра 7 вялікіх навацый  Андрэй Крывашэеў.

Сем разоў адмерай, адзін раз адрэж. Залатое правіла добрага будаўніка абсалютна прымальна і ў дзяржкіраванні. І тут не мае значэння лібералы ва ўладзе або сацыял-дэмакраты. Напрыклад, той жа рыначны Еўрасаюз абсалютна адміністрацыйна і жорстка ўкараняе зялёныя стандарты ў энергетыцы, умешваецца ў пытанні ўпакоўкі і другсыравіны, электра- і гарадскога транспарту. Тлумачыцца такая нярыначнасць проста: мы дзейнічаем у грамадскіх інтарэсах і ўсё добра пралічылі. Як паказвае наша практыка, уключаючы сённяшнюю нараду на вышэйшым узроўні,  роўна гэтак жа паступае і ўлада беларуская. Хіба што кантроль выканаўцаў у нас больш строгі. 

Першае пытанне на нарадзе - абарона інтарэсаў людзей на выпадак банкруцтва. Да гэтага падступаліся, як у прыказцы, мінімум разоў 7-8. Тыя ж прафсаюзы прапанавалі дадаткова страхаваць прадпрыемствы ад нявыплаты зарплат. Узносы невялікія, але работнікам гарантаваны зарплаты на 3 месяцы наперад. Прэзідэнт бачыць праблему шырэй: не грошы галоўнае, больш важна выратаваць вытворчасць і калектыў. 

Гэтак жа думае і ўмоўна ліберальны Еўрапейскі саюз, які асобнай дырэктывай абавязвае даваць банкрутам другі шанец. Дырэктыву ўлічаць і нашы заканадаўцы.  Прэзідэнт даручыў перадаць ім праект на самую дэталёвую дапрацоўку. Прыярытэт даўжнікам, а не крэдыторам. 


Новыя тараматы або мадэрнізаваны збор тары?


Экалогія. Беларусь свядома ідзе на азеляненне эканомікі: папера замест пластыку, напоі ў шкле, а не ПЭТах, паасобны збор смецця. Адно з рашэнняў, падгледжанае ў суседзяў, - дэпазітна-закладная сістэма. Г.з. у кожным тавары знаходзіцца кошт тары, якую можна вярнуць, ці то гэта пластык, метал або шкло. 

Модныя тараматы, аўтаматычныя прымальнікі і сартавальнікі ўкаранёныя ўжо ў 10 краінах Еўропы. Ахопліваюць амаль 140 мільёнаў чалавек. Суседзі ў Літве навучыліся вяртаць 90 % усёй упакоўкі для напояў. За збор і перапрацоўку плаціць вытворца.

Беларускія распрацоўшчыкі пераконваюць: сістэма створыць больш за паўтары тысячы рабочых месцаў, а плацяжы насельніцтва за паслугі па абыходжанні з адходамі знізяцца на 10 %. І быццам правільна і добра на паперы, але Прэзідэнта бянтэжыць: чаму на два гады зацягнуты тэрміны ўкаранення, чаму не спраўляецца спадчына з савецкіх пунктаў прыёму другаснай сыравіны? 

Па выніку Прэзідэнт у цэлым адобрыў укараненне навацый, але перш запатрабаваў грунтоўную даведку: што можна захаваць і палепшыць у нашай сістэме, перш чым пераходзіць на швейцарскую або літоўскую. 


Не захаваў дзяржмаёмасць - пакрый шкоду


Тая ж руплівасць у абыходжанні з агратэхнікай. Прэзідэнт забараняе пладзіць новых кантралёраў, але за бяспеку людзей і спраўнасць маёмасці кіраўнікі адкажуць спаўна без ліберальных скідак. Хочаш рынку - купляй камбайн або трактар за свае. 


Рыхтуй санкі ўлетку, а тэхніку ўзімку

З улікам анамальна цёплай зімы руплівасць ужо можна праверыць. Гэта майстэрні племзавода "Рось" пад Ваўкавыскам. Усе трактары і прычапное даўно прайшлі тэхагляд, і ўжо ў палях. На планавым абслугоўванні толькі пару адзінак кормаўборачнай тэхнікі.

Вопытны механізатар сваю машыну рыхтуе асабіста. Для Руслана Васілеўскага цяперашняя пасяўная ўжо 32-я. І хоць новы трактар і не патрабаваў рамонту, але кожны вузел і агрэгат быў правераны вельмі дбайна.


Дзякуючы дагледжанай тэхніцы Ваўкавыскі раён - адзін з лідараў у падрыхтоўцы да пасяўной

 
Як прэміраваць кіраўнікоў за добры вынік - абмяркоўвалі сёння ў Прэзідэнта. Калі паказчыкі раёна па бюджэце, прыбытках, рэнтабельнасці вышэйшыя за абласныя, за гэта можна будзе заахвоціць уладу мясцовую, не ламаючы ўсю сістэму аплаты працы.

Той жа прынцып і ў натарыяльнай справе: паляпшаць - так, але з аглядкай на інтарэсы людзей. Такое даручэнне Прэзідэнт даў ініцыятарам навацый - Мінюсту і Вярхоўнаму суду. 

За рулём электракара Артур ужо 5 гадоў і пры ўсіх але яшчэ ні разу не пашкадаваў, што адмовіўся ад рухавіка ўнутранага згарання. Сімбіёз экалогіі і эканоміі. Калі перакладаць у паліва, на сотню кіламетраў энергіі расходваецца як усяго за 1,5 літра бензіну. А дынаміка на ўсе 20. 

Гэта адчуў і Прэзідэнт аднойчы асабіста "прыручыўшы" Tesla, а пасля даўшы даручэнне стварыць беларускі электракар і аператыўна падцягнуць усю інфраструктуру. Ад зарадных станцый да льгот на набыццё. Скокі цэнаў на нафту толькі ў плюс электрамабілям. Урад адчытаўся: 250 зарадных станцый ужо створана. Плюс 100 да канца года. Але галоўнае даручэнне Прэзідэнта - знізіць кошт самога аўто - ва ўрадзе ведаюць як. 

Мыты і падаткі на электракары прапаноўваецца абнуліць. Таксама зусім хутка наша аўтаіндустрыя мае намер парадаваць нас прататыпамі электракараў і гібрыдаў. А вось на што спатрэбіцца ледзь больш часу, гаворыць уладальнік Tesla, гэта культура вадзіцеляў і рашучасць урада давесці сетку станцый сэрвісу і "аўтаразетак" да еўрапейскай нормы. 

Абарона людзей, экалогія, гаспадарская руплівасць, новая энергетыка і эканоміка - 7 вялікіх спраў, якія без цяганіны, але і без мітусні пралічылі сёння на вышэйшым узроўні. Большасць навацый пасля "шліфоўкі" заробяць для беларусаў ужо ў бягучым годзе.