Беларуская армія актыўна вядзе і тэхнічнае пераабсталяванне. Флагманам ваенна-прамысловага комплексу з'яўляецца Мінскі завод колавых цягачоў. Сёлета прадпрыемства адзначае юбілей. І ў свае 65 тут не перастаюць здзіўляць навінкамі. У тым ліку і грамадзянскага прызначэння. Асвойваюць і новыя рынкі збыту. МЗКЦ плануе пастаўкі ў ЕС аўтобусаў "Нёман" стандарту Еўра-6.
Аб гісторыі завода і сучасным этапе прадпрыемства - матэрыял Аляксандра Камовіча. Цяперашні завод колавых цягачоў быў заснаваны на тэрыторыі Мінскага аўтамабільнага завода ў 1954 годзе. Тады стварэнне канструктарскага бюро, якое спецыялізавалася на распрацоўцы цяжкай і звышцяжкай тэхнікі, стала прабацькам прамысловага гіганта - МЗКЦ. Паводле ацэнак спецыялістаў, сёння гэта адна з вядучых сусветных кампаній па распрацоўцы і вытворчасці колавых шасі і цягачоў.
З 2007 па 2016 гады ў мадэрнізацыю завода было ўкладзена больш як 110 мільёнаў долараў, што ў сваю чаргу дазволіла МЗКЦ стаць сусветным лідарам у сваім сегменце. Сучасныя станкі збіраюць прадукцыю ў цэхах прадпрыемства, гэта значыць - праходзіць поўны цыкл вытворчасці. Каб усё абсталяванне працавала, як гадзіннік, прыцягваюцца і самыя падрыхтаваныя кадры. Валерый Лазоўскі на прадпрыемстве ўжо 9-ы год. Гаворыць, працаваць у сучасных умовах - адно задавальненне.
МЗКЦ завуць флагманам беларускага ВПК. Тэхніка прадпрыемства паспяхова выкарыстоўваецца ў ракетных і сухапутных войсках, СПА, радыётэхнічнай разведцы. Аўтамабілі МЗКЦ славяцца высокай грузападымальнасцю, праходнасцю ў розных умовах на дарогах агульнага карыстання і пры поўным бездарожжы. Вось гэты аўтацягнік, якому ўжо далі мянушку "танкавоз", адна з навінак МЗКЦ. Агульная даўжыня з двума прычэпамі складае 42 метры. Гэтая машына можа адначасова перавозіць танк і бронетранспарцёр. Упершыню яе прадставілі на выставе "Мілекс 2019", і МЗКЦ адразу атрымаў некалькі цікавых кантрактаў.
Зрэшты, з улікам усёй сур'ёзнасці ваенных дагавораў лічбы тут называць не прынята. Іншая справа - грамадзянская тэхніка, лінейка якой таксама шырока прадстаўленая на прадпрыемстве. Адзін з перспектыўных кірункаў, гавораць на МЗКЦ, рынак ЕС. Тут упэўненыя: аўтобусы пад маркай "Нёман" ужо зусім хутка спадабаюцца еўрапейцам. Дарэчы, менавіта такія машыны вазілі гасцей II Еўрапейскіх гульняў па Мінску. Лінейка грамадзянскай тэхнікі, гавораць спецыялісты, ужо выгадна адрозніваецца ад канкурэнтаў. Як, напрыклад, будаўнічыя краны вялікай грузападымальнасці або шасі пад нафтагазавыя ўсталёўкі.
Легабраніраваныя машыны, цягачы, аўтобусы і шасі - на любога спажыўца. МЗКЦ зарабляе не толькі прэстыж, але і грошы. Зрэшты, тут аджартоўваюцца: грошы любяць цішыню. У найбліжэйшых жа планах мадэрнізацыя ўжо існуючай лінейкі, а за апошнія гады тут было распрацавана больш як 60 новых узораў. Ужо 65 гадоў брэнд МЗКЦ трымае марку.
