Эканомія рэсурсаў на карысць эканомікі! Мінск сёлета рэалізуе 120 энергазберагальных праектаў. Гэта і перавод кацельняў на мясцовыя віды паліва, і замена сістэм асвятлення на святлодыёды. Чаканы эфект ад эканоміі - больш за 70 мільёнаў рублёў. Аляксей Кандраценка - пра новыя падыходы да рацыянальнага выкарыстання.
Сталіца Нарвегіі - Осла. 80% ацяпляльнай сістэмы тут працуе на біяметане, атрыманым з адходаў горада. Больш за трэць жыхароў Капенгагена штодзень круцяць веласіпед, а Рэйк'явік дзякуючы гідраэнергетыцы і геатэрмальным крыніцам праз 30 гадоў поўнасцю адмовіцца ад паліва з нетраў зямлі.
Многія гарады свету імкнуцца да рэалій скандынаваў і праводзяць сваю палітыку энергазберажэння.
Так, толькі летась дзякуючы рацыянальнаму выкарыстанню рэсурсаў Мінск сэканоміў амаль 180 тысяч тон умоўнага паліва. Сёлетнія планы не менш маштабныя.
Дзмітрый Кулак, намеснік начальніка Мінскага гарадскога ўпраўлення дэпартамента па энергаэфектыўнасці Дзяржкамітэта па стандартызацыі Беларусі: "Плануецца замена цеплавых сетак, усталёўка новых цеплаабменнікаў. Нараўне з арганізацыямі ЖКГ рэалізуюць мерапрыемствы і прамысловыя прадпрыемствы. Гэта замена тэхналагічнага абсталявання. Гэта ўсё ў суме дае энергазахаванне горада - на 2018 год мы плануем сэканоміць 170 тысяч тон умоўнага паліва або 72 мільёны рублёў".
Тое, што шчэпкі ў 3-4 разы таннейшыя, чым газ - аксіёма энергетыкаў. У пытаннях маштабнага энергазберажэння тон задае прадпрыемства "Мінсккамунцепласетка".
Аляксандр Блашко, начальнік раённай цеплавой сеткі №8 УП "Мінсккамунцепласетка": "Кацельня ў пасёлку Баравая ўжо пабудаваная, там прайшла рэканструкцыя, і гэта дазволіла выкарыстоўваць долю мясцовых відаў паліва да 90%. Акрамя таго, ёсць праект па вуліцы Лынькова, які прызначаны для таго, каб павялічыць долю мясцовых відаў паліва".
Яшчэ адзін аспект - асвятленне гарадскіх вуліц. За 7 апошніх гадоў колькасць ліхтароў на вуліцах Мінска павялічылася на чвэрць - іх ужо больш за 110 тысяч. Расце і сам горад. Аднак узровень спажывання электрычнасці застаецца на ранейшым узроўні. Усё дзякуючы энергазберагальным прыборам.
Такія вырабляюць і на адным з мінскіх прадпрыемстваў. Напрыклад, святлодыёдныя лямпы, якія спажываюць у 5-7 разоў менш электраэнергіі, чым звычайныя, толькі частка карыснай для сталіцы прадукцыі.
Дарэчы, выключыць святло, ды і любыя электрапрыборы на выбар і тым самым стаць часткай найбуйнейшай экалагічнай акцыі свету, можна будзе ўжо заўтра. У суботу ўвечары а палове на дзявятую Мінск, як і сотні іншых гарадоў, сярод якіх тыя ж Осла і Капенгаген, далучыцца да "Гадзіны Зямлі". На 60 хвілін святло пагасне на Нацыянальнай бібліятэцы, каланадзе Акадэміі навук, варотах Мінска і іншых знакавых будынках горада.
