Мэта - выпуск новай тэхнікі і ўзмацненне пазіцый на сусветным рынку.
БелАЗ плануе наладзіць вытворчасць кар'ерных самазвалаў з рухавікамі на прыродным газе. Гэты від паліва ў 4 разы таннейшы за дызельнае. Эксперыментальную мадэль ужо тэсціруюць у Расіі. Гэта сёння заявілі ў Жодзіне, дзе адбыліся перамовы кіраўніцтва Беларускага аўтазавода з прадстаўнікамі амерыканскай кампаніі Cummins. Адзін з вядучых вытворцаў рухавікоў супрацоўнічае з БелАЗам ужо 25 гадоў. У планах амерыканцаў таксама пашырэнне супрацоўніцтва з Гомсельмашам і "Амкадорам".
Пётр Пархомчык, гендырэктар ААТ "БелАЗ" - кіруючая кампанія холдынга "БелАЗ-холдынг": "У нас намечаны вельмі сур'ёзныя планы. Мы хочам, каб за 2018-2020 гады газавая тэматыка прысутнічала на ўсіх рухавіках грузападымальнасцю ад 90 тон да 220-240 тон. Мяняецца шэраг экалагічных патрабаванняў, і патрэбныя рухавікі павышаных экалагічных патрабаванняў. Гэта таксама задача, якую мы будзем разглядаць сёння".
Норберт Нустэрэр, намеснік дырэктара кампаніі Cummins (ЗША): "Наша супрацоўніцтва з БелАЗам на працягу чвэрці стагоддзя паказала, што ёсць паспяховыя прыклады глабалізацыі і міжнароднага гандлю. Дзякуючы нашай кааперацыі мы змаглі выйсці на сусветны рынак і стаць яго моцным прадстаўніком".
Кампанія Cummins - адзін з буйных сусветных вытворцаў дызельных рухавікоў для кар'ернай тэхнікі, аўтобусаў, суднаў. У карпарацыі каля 60-ці заводаў і сумесных прадпрыемстваў.
