Кампанія-рэзідэнт тэхнапарка дзеліцца інавацыйным вопытам з замежнымі калегамі. Лепшыя ідэі айчынных прадпрыемстваў ужо які год падхопліваюць канадцы і расіяне. Да канца 2015 года лепшыя беларускія тэхналогіі запрацуюць ужо ў абноўленым парку. Адна з інавацый - беражлівая вытворчасць, якая эканоміць і час, і грошы прадпрыемства. Попыт і прапанову на рынку інавацый вывучыла Юлія Плытнік.
Сістэма ачышчэння паветра на стадыі распрацоўкі выглядае як звычайны халадзільнік з мноствам кнопак. Але ўжо праз тры дні спецыялісты пераўтвораць гэты механізм ў паўнацэнную вентыляцыйную тэхніку.
Кіраўнік вытворчага холдынга Алег Кандрашоў прызнаецца, што за кожным этапам распрацоўкі сістэмы вентыляцыі стаіць кваліфікаваны спецыяліст. Толькі дзякуючы такой зладжанай працы на выхадзе атрымліваецца найноўшая тэхніка.
Алег Кандрашоў, кіраўнік вытворчага холдынга:
"Ён атрымлівае высакаякасны прадукт з-за таго, што сам геном якасці ўбудаваны ў тэхналагічны працэс на кожным этапе. Няма, напрыклад, службы АТК, якая ходзіць і правярае з лінейкай якасць выкананых вырабаў, а адно падраздзяленне правярае за другім. Таму праверка якасці прадукцыі адбываецца на кожным этапе вытворчасці - ад распрацоўкі да выпуску".
Сутнасць інавацый - кліент не выбірае з таго, што ёсць. Падыходы іншыя. Пакупнік робіць заказ, а вытворца выконвае пажаданні ў дакладнасці па параметрах, якія можна змяняць на любым этапе. Замест 60 дзён тавар рыхтуецца удвая хутчэй.
Алег Кандрашоў, кіраўнік вытворчага холдынга: "Высокай якасці мы дабіваемся на ўсіх этапах праектавання і распрацоўкі. За кошт даволі плаўнай і гнуткай вытворчасці ў нас атрымліваецца не штампаваць нейкія вырабы, а вырабляць менавіта тое, што трэба менавіта зараз кліенту".
А ў гэтым будынку працуюць навукоўцы. Вырабляюць лазеры, што выдаляюць варыкозныя вены, дробняць камяні ў нырках, лечаць трафічныя болькі. Распрацоўкі рэзідэнтаў тэхнапарка выкарыстоўваюцца ў Мінскай абласной клінічнай бальніцы і за восем гадоў выратавалі не адзін дзясятак жыццяў.
Уладзімір Давідовіч, дырэктар Мінскага гарадскога тэхнапарка: "Тут вырабляюць прадукцыю на экспарт, прадукцыю, якая дае дабаўленую вартасць - беспілотныя лятальныя апараты, прыборы радыёэлектроннай барацьбы, авіёніка".
Зараз у гэтым будынку ідзе рамонт. Найперш рэканструкцыя чакае сэрца тэхнапарка – адміністрацыйна-бытавы комплекс. Да канца 2015 года тут размесцяцца лазерныя, медыцынскія і біятэхналагічныя лабараторыі.
Беларускі тэхнапарк славіцца сваімі ўнікальнымі распрацоўкамі. Інавацыі рыхтуюць на пяці з паловай гектарах у дзевяці будынках недалёка ад Мінска. Да 30 рэзідэнтаў, якія працуюць у парку сёння, да канца года дадасца яшчэ 10. Папаўненне чакаецца пасля рэканструкцыі.
