Самая багатая правінцыя Кітая - Гуандун - умацоўвае супрацоўніцтва з цэнтральным рэгіёнам Беларусі! У дэлегацыі з Паднябеснай разам з кіраўніцтвам правінцыі Гуандун прыбылі і дырэктары буйных кампаній па вытворчасці электронікі, тэлекамунікацый, а таксама харчовай прамысловасці.
Чэнь Юэхуа, намеснік генеральнага дырэктара дэпартамента камерцыі правінцыі Гуандун (Кітай): "Беларусь, як і Кітай, імкнецца быць адкрытай краінай для ўсяго свету. Мы бачым, да якіх вынікаў такі падыход прывёў у Кітаі, і зараз хочам дапамагчы зрабіць такі ж скачок і вашай краіне. Тым больш, адразу тры кампаніі з правінцыі Гуандун увайшлі ў склад індустрыяльнага парка “Вялікі камень”. Заўтра адна з іх адкрывае сваю вытворчасць сучасных высокатэхналагічных сістэм асвятлення".
Акрамя таго, у напрамку Кітая прадпрыемствы Мінскай вобласці плануюць накіраваць вялікія патокі харчовай прадукцыі: усе кампаніі цэнтральнага рэгіёна ўжо маюць дазвол на пастаўкі сваіх тавараў на рынак Паднябеснай. Кантэйнеры плануюць пастаўляць па Новым Шаўковым шляху з дапамогай чыгункі. Першы грузавы цягнік праехаў па гэтым маршруце сёлета ў ліпені.
Сяргей Жалязняк, старшыня камітэта эканомікі Мінскага аблвыканкама: "Гэтая магістраль ужо задзейнічаная вельмі шчыльна. Нават хочам пашыраць колькасць саставаў для паставак нашай прадукцыі менавіта на кітайскі рынак".
Пагадненне аб супрацоўніцтве паміж правінцыяй Гуандун і Мінскай вобласцю было падпісана яшчэ ў 2012 годзе. Гэты кітайскі рэгіён з'яўляецца адным з галоўных фінансавых цэнтраў Паднябеснай - менавіта тут размясцілі свае вытворчасці такія кампаніі-гіганты, як “Хуавэй”, ZTE і іншыя.
