"Камволь" прайшоў маштабную мадэрнізацыю. Камбінат наведала Наталля Качанава

25 Сакавіка 2020
Пашырыць асартымент і выйсці на продаж прадукцыі з высокай дабаўленай вартасцю - такія задачы закліканы вырашыць створаны на "Камволі" дызайн-цэнтр. Сёння камбінат наведала спікер верхняй палаты парламента Наталля Качанава. Прадпрыемства прайшло маштабную мадэрнізацыю. Яе вынікам павінны стаць пашырэнне асартыменту, павышэнне якасці і паніжэнне сабекошту прадукцыі. Гэта дазволіць выйсці на запланаваныя інвестпраектам параметры эфектыўнасці. Нагадаем, акрамя парламенцкай дзейнасці, Наталля Качанава курыруе Мінск у якасці ўпаўнаважанага Прэзідэнта. Падчас наведвання "Камволя" яна азнаёмілася з дзейнасцю дызайн-цэнтра. Па сутнасці, гэта вытворча-адукацыйная пляцоўка для крэатыўных мастакоў. Сваю фантазію яны ўвасабляюць у мужчынскіх і жаночых касцюмах. Усе мадэлі - з вырабленай на прадпрыемстве тканіны. Такім чынам рэалізавалі ідэю прадаваць не толькі тканіну, але і гатовыя вырабы. А новы кірунак дзейнасці - гэта новыя рабочыя месцы. 

Наталля Качанава таксама пагутарыла з працоўным калектывам. Пасля мадэрнізацыі спецыялісты працуюць у годных умовах на сучасным абсталяванні. Швейныя прадпрыемствы краіны павінны працаваць на ўласнай сыравіне. А патэнцыяльныя магутнасці вытворчасці дазваляюць задаволіць патрэбнасці ўнутранага рынку. Акрамя таго, перад "Камволем" стаіць задача павялічваць экспарт і выпускаць прадукцыю, канкурэнтную на сусветным рынку.