Як мінімум 18 украінскіх рэгіёнаў прадэманструюць сваю лепшую прадукцыю на сумесным Форуме рэгіёнаў Беларусі і Украіны. У кастрычніку першую сустрэчу бізнесу ў такім фармаце прыме Гомель, а сёння падрыхтоўку да яе абмеркавалі ў Мінску ў Доме ўрада.
Праграма форуму не абмяжуецца толькі ўдзелам буйных прамыслоўцаў. Патэнцыял рэгіёнаў прадэманструюць у сельскагаспадарчай, энергетычнай, адукацыйнай і турыстычнай сферах. Чакаецца, што па выніках прэзентацый беларускія вытворцы ўмацуюць сваю прысутнасць на суседнім рынку.
Ігар Сокал, Надзвычайны і Паўнамоцны Пасол Беларусі ва Украіне: "Значныя рэформы ідуць ва Украіне. Яны тычацца абнаўлення пасажырскай тэхнікі, камунальнай, дарожна-будаўнічай тэхнікі. Рамантуюцца ў значнай колькасці дарогі. І гэта патэнцыял для нашых экспарцёраў. Мы хочам паказаць новую прадукцыю, якая ёсць у Беларусі, нашы інавацыйныя распрацоўкі. Нам ёсць чым ганарыцца. Гэта будзе цікава і для нашых губернатараў, і для ўкраінскіх. Таму што там да ўлады прыйшлі абсалютна новыя людзі, новага пакалення. І вопыт Беларусі ў плане наогул вядзення гаспадарання, эканомікі будзе ім вельмі цікавы".
Чаканні партнёраў звязаныя з падпісаннем кантрактаў, а таксама міждзяржаўных пагадненняў. Сёння самыя моцныя эканамічныя сувязі паміж краінамі падтрымліваюць прыгранічныя вобласці. У будучыні важна раскрыць узаемны патэнцыял і іншых рэгіёнаў, адзначыў пасол. Тым больш што афіцыйныя Мінск і Кіеў скіраваныя ўзяць гандлёвую планку ў 8 мільярдаў долараў. А гэта амаль удвая больш, чым летась.
