На Беларускім газаперапрацоўчым заводзе рэалізавалі інвестпраект агульным коштам больш за трыльён рублёў. Зараз тут цалкам аўтаматызавалі працэс перапрацоўкі газу і сталі выпускаць новыя віды прадукцыі, запатрабаваныя ў сусветных вытворцаў. Паводле ацэнак спецыялістаў, рэканструкцыя дазволіць павялічыць выручку завода на 20 мільёнаў долараў за год. Вольга Халадовіч больш падрабязна.
Такога ў нашай краіне яшчэ не будавалі. Каб цалкам аўтаматызаваць перапрацоўку газу, Беларускаму газаперапрацоўчаму заводу спатрэбіліся тры гады і больш за трыльён рублёў. Новая прадукцыя з больш высокай дабаўленай вартасцю адкрывае прадпрыемству і новыя рынкі збыту.
Сяргей Пашкоў, дырэктар Беларускага газаперапрацоўчага завода:
"80 % у нас ідзе на экспарт, у асноўным ідзе ў нас аўтамабільны транспарт. Забірае Польшча, забірае Украіна, забірае Сербія, забірае Балгарыя, забірае Румынія. Дзякуючы гэтай комплекснай рэканструкцыі мы ў прынцыпе замянілі ўсё абсталяванне, замянілі калоны, талеркі. Гэта дае нам магчымасць выпускаць як якасную, так і колькасную частку".
Да гэтага моманту завод выпускаў толькі аўтамабільнае паліва на аснове газу. Зараз яшчэ і тую сыравіну, якая запатрабавана на сусветным рынку.
У гэтых калонах газ чысціцца ад сярністых злучэнняў, вады, шчолачы і падзяляецца на фракцыі - складаныя часткі. На выхадзе тут атрымліваюць новыя віды прадукцыі, якія выкарыстоўваюць у нафтахіміі. Напрыклад, ізапентан - гэта кампанент 95-га і 98-га бензінаў.
Гэта самы маштабны праект нафтахімічнай галіны краіны, які быў рэалізаваны сёлета. Дзякуючы яму на заводзе зараз утылізуюць практычна ўвесь газ, які атрымліваюць у працэсе здабычы нафты.
Акрамя таго, дзякуючы выпуску новых відаў прадукцыі завод цалкам закрые і патрэбнасці ўнутранага рынку. За год тут будуць перапрацоўваць 550 тысяч тон сыравіны.
