Гродзенскія аграрыі завяршаюць вяснова-палявыя работы і пачынаюць першы ўкос

16 Мая 2020
Сяўба аднагадовых траў і нарыхтоўка зялёных кармоў. Гродзенскія аграрыі завяршаюць вяснова-палявыя работы і пачынаюць першы ўкос. Зялёную масу закладваюць у траншэі на сілас. Каб у тэрмін правесці нарыхтоўку, на палеткі вывелі ўсю тэхніку. Галоўная задача - забяспечыць якасным кормам жывёлагадоўлю.

Падрабязнасці ў рэпартажы Юрыя Карняловіча. Механізатар Юрый Мелех на вяснова-палявых работах ужо 24-ты сезон. Прызнаецца, пра кожную сельскагаспадарчую культуру можа расказаць не горш за агранома. Кожны год пачынае з сяўбы ранніх збожжавых і сканчвае кукурузай. Сёлета фінішуе аднагадовымі травамі.

Сяўба аднагадовых траў - выдатная магчымасць дапоўніць рацыён малочнага статка зялёным кормам. Вытворчасць мяса і малака - спецыялізацыя гэтай гаспадаркі. Тут утрымліваюцца больш за шэсць з паловай тысяч галоў буйной рагатай жывёлы, і прыродныя сенакосы і поплавы не спраўляюцца з аб’ёмамі. Таму прыходзіцца дадаткова высяваць траву.

На пачатку лета трава ўзыдзе, і ўжо ў верасні мясцовыя фермы атрымаюць дадатковы пажыўны корм. Адначасова з сяўбой травы ў гаспадарцы займаюцца і нарыхтоўкай зялёных кармоў. На гэтым полі скошваюць азімае жыта і закладваюць у траншэі. Ужо праз месяц сіласам будуць карміць жывёл.

Першы ўкос сёлета пачалі раней за звычайнае. Уся справа ў цёплым надвор’і. Паводле слоў аграномаў, вельмі важна не прапусціць момант нарыхтоўкі. Бо пераспелая зялёная маса страчвае сваю харчовую каштоўнасць.

Бесперапынная нарыхтоўка зялёных кармоў у гаспадарцы будзе весціся да позняй восені. Бо да рацыёну сваіх жывёл спецыялісты падыходзяць вельмі адказна. Вітаміны, харчовыя дабаўкі, бялкі. Ад такога меню малако на гэтай ферме атрымліваюць толькі класа экстра. А надоі растуць кожны месяц.

Практыка нарыхтоўкі зялёных кармоў ужо ў сярэдзіне мая распаўсюджана ў Ваўкавыскім раёне. Для гэтага адпаведныя культуры высяваюць яшчэ з восені. І з кожным годам плошчы пад такія пасевы толькі павялічваюцца.

Асноўную ж масу зялёнага корму ў гэтай гаспадарцы нарыхтуюць на традыцыйных сенакосах, дзе растуць шматгадовыя травы. Іх тут больш за 1300 гектараў.