Нарошчвае гандлёва-эканамічны патэнцыял і найбуйнейшы беларускі рэтэйлер. Еўраопт пашырае сваю прысутнасць на рынку суседніх краін. Сёння ў прыватнай беларускай гандлёвай сеткі каля трох дзясяткаў магазінаў у Расіі. Зараз яшчэ і ў Бранску. Магазіны па прынцыпе "ля дома", у якіх прапанавана значная частка беларускіх тавараў, карыстаюцца нязменным пакупніцкім попытам. Больш падрабязна Вольга Халадовіч.
Беларускі Еўраопт пад брэндам "Еўрагандаль" ужо больш за 2 гады працуе ў Расіі. Гэта магазіны ля дома адносна невялікія, але з шырокім асартыментам харчовых і прамысловых тавараў. І яшчэ прадукцыя ўласнай вытворчасці - гатовая кулінарыя і мясныя паўфабрыкаты.
Акцэнт на беларускае - гэта ў першую чаргу акцэнт на якасць. Тавары, якія вырабляюць у Беларусі, на паліцах расійскага Еўраопта, як правіла, самыя запатрабаваныя.
Вось такія значкі з надпісам "Зроблена ў Беларусі" дапамагаюць сарыентавацца расійскаму пакупніку. Значную долю ў тавараабароце магазінаў "Еўрагандаль" на тэрыторыі Расійскай Федэрацыі складаюць менавіта беларускія тавары.
Для беларускіх вытворцаў развіццё расійскага Еўраопта - гэта яшчэ адна магчымасць пашырыць сваю прысутнасць у суседняй краіне. За ўваход у любую расійскую сетку неабходна заплаціць, і, як правіла, гэта немалыя грошы. Прасоўваннем свайго вытворцы Еўраопт займаецца бясплатна. Пераканаўшыся, што пакупнік з задавальненнем бярэ беларускія тавары, шматлікія расійскія магазіны бясплатна адкрыліся для паставак прадукцыі з Беларусі.
Гэта віцебскае прадпрыемства па вытворчасці малочных прадуктаў таксама змагло заваяваць расійскі рынак.
Аляксандр Лукінаў, генеральны дырэктар прадпрыемства па вытворчасці малочных прадуктаў: "Пакупнікам падабаецца наша прадукцыя ў Расіі ў сетцы "Еўраопт". Сама сетка, я хачу асабліва адзначыць, дынамічная, канкрэтная, зразумелая. Рады таму, што нашы партнёры, прымаючы нас як надзейных партнёраў, запрасілі нас у свае гандлёвыя сеткі за межамі. Гэта для нас з'яўляецца патрэбным, карысным, важным. Усё гэта прыводзіць да росту нашых экспартных паказчыкаў, да росту аб'ёмаў экспарту".
Сёння ў беларускага Еўраопта каля 30 магазінаў у Расіі - Бранск, Смаленск, Масква. Прычым у расійскай сталіцы працуе інтэрнэт-магазін. Колькасць магазінаў у Расіі найбуйнейшы беларускі рытэйлер плануе павялічваць. Пытанне толькі ў прыцягненні дадатковых інвестыцый.
Андрэй Засценскі, генеральны дырэктар сеткі "Еўраопт" на тэрыторыі Расіі: "З самога пачатку да сённяшняга дня развіццё на тэрыторыі Расіі мы ажыццяўляем за кошт уласных сродкаў кампаніі. Створана добрая платформа для прасоўвання беларускіх тавараў. Але мы маглі б развівацца ў некалькі разоў хутчэй, калі б была дастатковая падтрымка з боку банкаў. Пры наяўнасці банка-партнёра, які б падтрымліваў наша развіццё".
Шматлікія эксперты фінансавага рынку лічаць, што падтрымка з боку дзяржавы буйных інвестыцыйных праектаў у Расіі была б дарэчы і стала б прыкладам эфектыўнага прыватна-дзяржаўнага партнёрства. Бо пашырэнне паставак прадуктаў харчавання і прамысловых тавараў на расійскі рынак у інтарэсах беларускай эканомікі. У выпадку прыцягнення інвестыцый да канца года Еўраопт мае намер адкрыць на тэрыторыі Расіі да 50 сваіх магазінаў.
