Доля ад лічбавай эканомікі ў ВУП краіны да 2025 года можа вырасці ўдвая і скласці не менш як 10 працэнтаў. Гэта паведамілі сёння на калегіі Мінсувязі. Створаны прававыя механізмы, галоўны з якіх Дэкрэт № 8 "Аб развіцці лічбавай эканомікі". Сёння ўсе галіны паступова пераходзяць на новы ўзровень развіцця. Сёлета цалкам закрыюць і пытанне з інфраструктурай. Аптавалакно правядуць да кожнага спажыўца, а на гэтай платформе можна развіваць паслугі і для бізнесу. Аб трансфармацыі ўсіх галін і першым ID-пашпарце – больш падрабязна Святлана Лук’янюк.
Гэта разумны дом. На экране ўся сістэма назірання і датчыкаў. Бачыць на адлегласці праз свой смартфон сёння могуць 40 тысяч карыстальнікаў у Беларусі. Большасць з іх - працэнтаў 60 - бізнес.
Але гэта толькі частка вялікага шляху лічбавай Беларусі. Інтэрнэт рэчаў, разумныя гарады, тое, што робіць жыццё простага чалавека камфортным. Бо больш за ўсё ў наш час каштуе менавіта час, і яго мы вучымся эканоміць. Электронная медыцына і адукацыя - праекты, пра якія ўжо заяўляюць, пры гэтым адшліфоўваючы хуткае атрыманне інфармацыі пры запыце. Але гэта толькі пачатак. Галоўнае - ёсць мэта.
Атрымліваецца, сёлета пытанне з інфраструктурай будзе закрыта цалкам. А на яе, як на каркас, можна нанізваць паслугі і прапановы.
Напрыклад, дастукацца да дзяржоргана за адзін клік са свайго мабільнага прыстасавання стане прасцей і хутчэй - да гэтага, уласна, і імкнёмся. Каб атрыманне нейкай даведкі не адымала шмат часу на чэргі і дарогу. Тым больш, той жа выканкам можа быць за некалькі кіламетраў ад дома, калі браць сельскія населеныя пункты. У стагоддзе лічбавізацыі гэтыя адлегласці павінны быць непрыметнымі.
Як прыклад - новы пілотны праект ад пошты. Яна заўсёды побач, але калі не стацыянарная, то на колах сапраўды прыедзе. І як такой лагістыкай не скарыстацца. Падлічылі і вырашылі, у Фаніпалі і Барані па даведкі бегаць да мясцовай улады не трэба. Усе пытанні можна вырашыць на пошце. “Адно акно” адкрываецца і тут. Калі попыт будзе, вопытам падзеляцца і з іншымі раёнамі.
Паштальён будучыні - гэта не той, хто прыносіць пенсію і газету. Гэта было ўчора. А заўтра ён не толькі тавар з інтэрнэт-магазіна закажа, але і дапаможа адразу аплаціць, атрымліваецца, лёгкі шопінг, ды і іншыя плацяжы гатоўкай або безнаяўнасцю за пару хвілін. У дапамогу вось такія міні-касы. Гавораць, да жніўня яны будуць больш, чым у тысячы паштальёнаў. Але ёсць, праўда, умова - устойлівы інтэрнэт-сігнал.
Гэта толькі маленькая частка, калі інфармацыйна-камунікацыйныя тэхналогіі прыходзяць у наша жыццё. І гэта не проста якасць паслуг новага ўзроўню. Гэта і эканоміка на ўздыме за кошт прадукта заўтрашняга дня. Аб гэтым сёння гаварылі на калегіі Мінсувязі. Выгады відавочныя. Калі восем гадоў таму ўклад у ВУП ад сектара інфарматызацыі і сувязі быў прыкладна 2,5 працэнта, то летась удвая больш.
У гэты сусветны трэнд лічбавізацыі, калі ўсё хутка, без залішніх пытанняў, нам трэба ўкліньвацца, прычым, уключаючы высокія хуткасці, бо да лідараў жадаем падцягнуцца.
Міжнародны саюз электрасувязі топ-тройку вылучыў такую: Ісландыя, Паўднёвая Карэя і Швейцарыя. У нас самае высокае месца сярод краін-партнёраў па СНД. 32-гі радок у спісе 176 краін.
Ацэньваецца ўзровень цяперашніх ІКТ, ці бачная эвалюцыя і ці ёсць перспектывы развіцця ў кантэксце магчымасцяў і навыкаў. Па сутнасці, месца высокае, але на ім застаемся два гады. Але ці ёсць рэзервы для руху ўверх?
Электронны ўрад дазволіць зрабіць зносіны грамадзян і дзяржавы больш камфортнымі. У наступным годзе абяцаюць, што ў пачатку студзеня ўжо з'явяцца і першыя атрымальнікі ID-карт. Лічба паступова прыйдзе ва ўсе галіны: сельскую гаспадарку, прамысловасць, транспарт, сувязь. Шырэйшым будзе і ахоп медпаслуг.
