Прыклад дыверсіфікацыі экспарту беларускіх машынабудаўнікоў. Аб трамваях "Мяцеліца", якія вырабляюць на "Штадлер Мінск", мы ўжо распавядалі ў "Панараме". Завод у Фаніпалі выконвае вялікі заказ для Пецярбурга - гэта 23 саставы. І вось экспартны вектар гэтага халаднаватага брэнда пакарае ўжо цеплалюбівую Балівію. Дэлегацыя лацінаамерыканскай краіны з прадстаўнікоў урада, прамыслоўцаў, інжынераў і журналістаў сёння наведала прадпрыемства пад Мінскам. Тэст-драйв "Мяцеліцы" ўбачыў Аляксей Кандраценка.
Сапраўды, "Мяцеліца" па-свойму інавацыйны трамвай. Ён можа адначасова перавозіць больш за 370 чалавек. Плюс сістэма ўліку пасажыраў, кандыцыянер, USB зарадка, Wi-FI і шматлікае іншае. Усё гэта, напэўна, ацэняць і балівійцы.
Горад Качабамба, куды адправяцца "Мяцеліцы", - трэці па колькасці насельніцтва ў Балівіі (каля мільёна чалавек). Тут развіты турызм, ёсць буйны ўніверсітэт. Удасканальваецца і транспартная інфраструктура: тут будуюць новую трамвайную лінію.
Там і будзе праз два гады працаваць беларускі электратранспарт. Убачыць, дзе і як ствараюцца "Мяцеліцы", на завод у Фаніпаль прыехала дэлегацыя ўлад Качабамбы, а таксама транспартнікі, інжынеры і журналісты. Па працы прадстаўнікоў СМІ прыкметна, што цікавасць павышаная: стэндапы і інтэрв'ю наперабой запісвалі ў зборачных цэхах.
Сам жа "Штадлер Мінск" скіраваны і на іншыя праекты. Сярод іх кантракты на вытворчасць электратранспарту для Грузіі, Азербайджана, Нарвегіі, а таксама Мінскага метрапалітэна. Гэта цягнікі са скразнымі вагонамі прынцыпова новага ўзроўню і класа. Напрыклад, увесь кузаў будзе на 100 % з лёгкага, але звышмоцнага алюмінію.
Ужо ў пачатку 2019 года электрацягнікі "Штадлер" будуць курсіраваць у мінскай падземцы. Праўда, пакуль для абкаткі і сертыфікацыі. У найбліжэйшыя 2 гады 12 "Мяцеліц" паедуць з Беларусі ў Паўднёвую Амерыку. Хоць убачыць нашы трамваі ў паўнавартаснай працы балівійскія спецыялісты змогуць ужо заўтра ў Санкт-Пецярбургу. Менавіта ў паўночнай сталіцы Расіі такі транспарт ездзіць увесь гэты год.
