Сітуацыя ў эканоміцы - паказчык працы праваахоўных структур. Гэта заявіў генеральны пракурор Беларусі падчас адкрыцця новага будынка ведамства ў Быхаве. Паводле слоў Аляксандра Канюка, сярод галоўных акцэнтаў у працы не толькі барацьба з карупцыяй і навядзенне парадку ў фінансава-крэдытнай сістэме прадпрыемстваў, але і аказанне дапамогі ў вяртанні даўгоў з-за мяжы. Так, напрыклад, аднаму з буйных магілёўскіх вытворцаў дзякуючы сумеснай працы пракуратуры і іншых праваахоўных служб дапамаглі вярнуць больш за 5 мільярдаў рублёў.
Аляксандр Канюк, Генеральны пракурор Беларусі: "Зараз мы выпрацоўваем новыя крытэрыі дзейнасці пракурораў. Акрамя спрадвечных - абароны законных правоў і інтарэсаў грамадзян, сёння адным з прыярытэтаў з'яўляецца эканоміка. Мы шмат працуем над гэтым. І адным з крытэрыяў працы пракурораў з'яўляецца эканамічны складальнік".
Генеральны пракурор асабіста ацаніў умовы нясення службы ў пракуратуры раёна. Зараз тут ёсць не толькі ўтульныя кабінеты, пакой адпачынку, з гэтага часу прыём грамадзян будзе праходзіць у камфортных умовах.
