Гэта, пэўна, самы гучны беларуска-кітайскі праект - "Вялікі камень". Першыя вытворчасці адразу трох кампаній пачнуць сваю працу ў індустрыяльным парку менш чым праз год. Раней за астатніх адкрыецца завод па выпуску суперкандэнсатараў - магутных назапашвальнікаў энергіі для электробусаў, далей запрацуе вытворчасць прамысловых лазераў, а таксама будаўнічай і камунальнай тэхнікі.
З апошніх дамоўленасцяў - пагадненні з нямецкімі кампаніямі. Гэта вытворцы кампазітных матэрыялаў і святлодыёдных лямп. Яшчэ два новыя рэзідэнты з агульным аб'ёмам інвестыцый 7 мільёнаў долараў прыйшлі ў парк літаральна тыдзень таму. Адна - кампанія з кітайскім капіталам, другая з Магілёва, вырабляе прамысловыя кандыцыянеры. Гэта 23-і рэзідэнт парка і чацвёрты з Беларусі.
І ўсё ж пакуль сэрца "Вялікага каменя" б'ецца не ў поўную сілу, але ўжо гатовае да сур'ёзных нагрузак. Стварэнне інфраструктуры парка на тэрыторыі першачарговага засваення, куды ўжо інвеставана амаль 150 млн. долараў, фактычна завершанае. Зараз на тэрыторыі парка кожны дзень працуюць каля трохсот чалавек - гэта беларускія і кітайскія будаўнікі, персанал першых аб'ектаў парка - гасцініцы выставачнага цэнтра. Жыццё "Вялікага каменя" вачыма нашага карэспандэнта Надзеі Сербіненкі.
Кітайска-беларускі індустрыяльны парк "Вялікі камень" - гэта новы горад, які ўзводзіцца ў нас на вачах. Зараз тут ёсць свае праспекты, гатовая інжынерная інфраструктура, пабудаваныя гасцініца, гандлёва-выставачны цэнтр і адміністрацыйны будынак. І сёння мы пагрузімся ў звычайнае жыццё парка, правядзем тут цэлы працоўны дзень.
Зараз мы знаходзімся ў сапраўды стратэгічным аб'екце - у лагістычным цэнтры. Пакуль ён яшчэ толькі рыхтуецца да свайго паўнавартаснага жыцця, але ўжо тут знаходзяцца першыя тавары. А ў поўную моц лагістычны цэнтр пачне працаваць праз 2 месяцы.
Вось так будуць выглядаць экспазыцыі. Гэта значыць - кампанія, якая прадстаўляе свой тавар або паслугу, можа заняць вызначаную плошчу і ўладкаваць тут усё па сваім жаданні: тут можа быць і зала для перамоў, і такі стэнд, каб прыцягнуць патэнцыйных бізнес-партнёраў.
Як можна пабываць у "Вялікім камені" і не паспытаць ежу, якую ядуць усе кітайскія будаўнікі? Выбар нядрэнны.
Цалкам лагічна, што ў кітайска-беларускай гасцініцы ўсе надпісы на трох мовах - кітайскай, рускай і англійскай. Гасцініца парка разлічаная на 65 нумароў. Мы знаходзімся ў стандартным - аднамесным. Тут ёсць усё неабходнае для жыцця бізнесмена.
Звычайна сюды журналістаў не пускаюць. Зараз мы знаходзімся на даху адміністрацыйнага будынка парка, адгэтуль можна ўбачыць, як змяняецца парк.
Першай вытворчасцю, якая запрацуе у парку ўжо ў наступным годзе, стане завод кампаніі "Чэнду Сіньджу". У Смалявіцкім раёне яны будуць вырабляць суперкандэнсатары - батарэі для электратранспарту.
І ўсё ж "Вялікі камень" - гэта не проста прамысловы горад. Гэта горад, у якім зусім хутка будуць жыць і працаваць тысячы людзей. Падмурак пакуль першага жылога дома індустрыяльнага парка ўжо закладзены.
