Уборачная кампанія ў Беларусі не зніжае тэмпаў. Дапамагае аграрыям і надвор'е. З выконваннем тэхналогій і жорсткай дысцыплінай, аб чым напярэдадні гаварыў Прэзідэнт, наведваючы Віцебскую вобласць, ёсць усе падставы сцвярджаць: будзем з хлебам. Гэта асабліва актуальна на фоне інфармацыі аб сур'ёзных праблемах у сельскагаспадарчай вытворчасці ў свеце. Аналітыкі ўжо прагназуюць рост попыту і цэн на харчаванне ў найбліжэйшай перспектыве. Беларусь па намалоце збожжа ўпэўнена набліжаецца да 4-мільённага рубяжа.
Толькі за апошнія суткі ўраджайныя засекі папоўніліся больш чым на 200 тысяч тон. На сёння вага беларускага каравая складае 3 мільёны 287 тысяч тон збожжа. Да мільёна набліжаецца сталічны рэгіён. У Брэсцкай вобласці ўбрана 80% збожжа. Гродзенскія аграрыі намалацілі звыш 700 тысяч тон хлеба - тут традыцыйна самая высокая ўраджайнасць. Амаль нараўне ідуць Гомельская і Віцебская вобласці. Магілёўскі рэгіён набірае тэмпы і набліжаецца да адзнакі ў 300 тысяч тон. Сярэдняя ўраджайнасць па краіне - 28 цэнтнераў з гектара.
На ўборку ўраджаю ў гэтыя дні кінутыя ўсе сілы. У палях дзяжураць рамонтныя брыгады, тэхніка МНС, на дапамогу аграрыям прыйшлі ваенныя. Але самае галоўнае - на хлебнай ніве працуюць невыпадковыя людзі. Напрыклад, толькі ў Магілёўскай вобласці больш як 120 сямейных экіпажаў, якія па факце "прыраслі да зямлі" - да сваёй малой радзімы. Таму нядзіўна, што сёння яны ў ліку лідараў уборачнай.
Андрэй Ястрабаў прадоўжыць. Сямейны дуэт Мікалая і Андрэя Дрозд адзначае сапраўдны юбілей на ўборачнай. Для бацькі ўжо 30-я. 5 гадоў таму за штурвал камбайна сёў і яго сын. І вось ужо трэці год запар яны разам у тысячніках па намалоце.
Таму і прыпынак у полі хіба што для невялікай урачыстасці ў гонар лідараў. 5 хвілін на канцэрт, яшчэ пяць на віншаванні. І запаветная наклейка ўраджаю-2018 "1000 тон" - на борце. На рахунку Кіраўскага раёна такім чынам ужо 20 тысяч тон збожжа.
Яшчэ адна асаблівасць цяперашняй убарачнай - 130 маладзёжных экіпажаў. І гэта толькі на ўсходзе краіны. У тым ліку кіроўцаў. Ігар Ерашаў стаў тысячнікам на перавозцы збожжа. Вымпел маладога лідара зараз у яго кабіне.
У полі ўсе 22 камбайны гаспадаркі, 28 машын на перавозцы, плюс 10 - дапамога вайскоўцаў. Як вынік - збіраюць збожжа не толькі са сваіх палёў, але і ўсяго раёна. 1300 тон за дзень пры ўраджайнасці пшаніцы - да 75 ц/га.
Кіраўнік дзяржавы ў гэтыя гарачыя для аграрыяў дні па традыцыі наведвае сельгаспрадпрыемствы краіны. Напярэдадні Прэзідэнт пабываў у Віцебскай вобласці. Аляксандр Лукашэнка запатрабаваў узмацніць тэхналагічную і кадравую дысцыпліну падчас жніва.
Каму, як не сталічнаму рэгіёну, быць прыкладам. Агракамбінат "Сноў" часта ўстанаўлівае рэкорды па ўраджайнасці, надоях і тэмпу ўборачнай. У гэтым сезоне ў СВК адразу тры экіпажы з асабістым намалотам у дзве тысячы тон збожжа. У тым ліку і таму, што ні на крок не адыходзяць ад тэхналогій.
Уборачная кампанія ў цэнтральным рэгіёне пераадолела экватар. Больш за палову з усіх палёў з зерневымі ўжо ўбрана. Зараз тэхніка ў палях з раніцы і да позняга вечара. Сабраць увесь ураджай да апошняга зярнятка - такая задача пастаўленая перад аграрыямі.
І, вядома ж, вынік усіх гэтых намаганняў у кругласутачным рэжыме: вялікагрузы вязуць збожжа на камбінаты хлебапрадуктаў краіны. На прадпрыемствы ў Віцебску аўтацягніка робяць некалькі рэйсаў у дзень.
90% прынятага ўраджаю з палёў паўночнага рэгіёна - гэта харчовая пшаніца з высокім утрыманнем клейкавіны, а значыць - хлебу быць. І быць смачным.
